Kastriot Iseini: 28 Nëntori në Kërçovë: Populli në Shesh, Politikanët në Hije

Sot, si një mërgimtar nga Kërçova, ndjej krenari për frymën e unitetit dhe shpirtin e kombit tonë që u manifestua gjatë organizimit të festimeve për 28 Nëntorin – Ditën e Flamurit.

Kjo ngjarje, e inicuar nga artistët tanë të përkushtuar dhe nga një lëvizja qytetare veprimtare në Kërçovë, ishte një shembull i gjallë i asaj se si populli ynë, me zemër të pastër dhe vullnet të palodhur, di të ngrejë zërin dhe të mbajë gjallë traditat tona kombëtare.

Por një pikë e hidhur nuk mund të lihet pa u përmendur. Ishte e dukshme mungesa e funksionarëve dhe deputetëve tanë, qoftë pozitë apo opozitë, atyre që marrin votat tona dhe që kanë për detyrë të jenë pranë popullit, jo vetëm në fushata elektorale, por edhe në momente kaq të rëndësishme për kombin tonë.

Të festosh 28 Nëntorin nuk është vetëm një akt ceremonial, por një obligim moral, akt patriotik, respekti dhe përulësie ndaj historisë sonë dhe njerëzve që punojnë për ta mbajtur të gjallë atë histori.

Kur qytetarët tanë mbushin sheshet për të festuar identitetin dhe kulturën tonë, është e pafalshme që përfaqësuesit tanë politikë të mungojnë. Ata duhet të jenë aty, në mesin e popullit, për të dëshmuar se shërbejnë jo vetëm për privilegje personale, por për të mirën dhe nderin e kombit.

Kërçova ka qenë gjithmonë një simbol i krenarisë kombëtare dhe qytetarisë aktive. Sot, unë uroj që ata që pretendojnë të na përfaqësojnë, të rikthehen te populli dhe të bëhen pjesë aktive dhe mbështetëse e manifestimeve të tilla, duke dëshmuar se nuk kanë harruar nga vinë dhe përgjegjësinë që kanë marrë mbi vete.

Nderime për të gjithë ata që dhanë shpirt dhe përkushtim për këtë ngjarje të mrekullueshme! Le të jemi të bashkuar në çdo hap për të mbrojtur dhe kultivuar vlerat tona kombëtare.
Kastriot Iseini

/ms