Kah t’ia mbajnë shqiptarët e Maqedonisë së Veriut në kohën e acarimit të raporteve Rama-Kurti..?

Kryeministri i Kosovës, Albin Kurti, refuzoi edhe një herë kryeminsitrin e Shqipërisë, Edi Rama. Kurti nuk ka pranuar të marë pjesë në takimin e shteteve të rajonit që sot mbahet në Tiranë, në kuadër të Iniciativës së Berlinit. Është e qartë hatërmbetja e kryeministrit të Kosovës ndaj Ramës dhe bindja e tij se në krizën e fundit që e kaloi Kosova në Veriun e kontrolluar kryesisht nga serbët, Shqipëria dhe kryeministri i saj nuk e luajtën rolin që u takon.

“(S)Thërret Prishtina, mori Shkodër…”
Në fakt, hatërmbetja daton prej më herët, kur Tirana me ngulm favorizonte iniciativën e “Open Ballkanit”, të cilën kreu shtetëror kosovar e konsideronte si projekt që është në favor të Serbisë dhe Rusisë. Ndërkohë kryeministrat e dy vendeve kishin disa takime mes tyre, ku vërehej një raport i relaksuar, por që më vonë të kuptojmë se bëhet fjalë vetëm për aktrim të mirë nga ana e tyre, sepse raportet e ndërsjella nuk ishin në nivelin e kënaqshëm.

Kjo u dëshmua edhe kah mesi i qershorit, kur u anulua mbledhja e përbashkët e qeverive të Shqipërisë dhe Kosovës që duhej të bahet në Gjakovë. Në këtë mbledhje ishte planifikuar edhe takimi i kryetarëve të komunave të zonave kufitare në të dyja vendet, ku pritej të diskutoheshin që sfidat të kthehen në përfitim për qytetarët, shkruan Zhurnal.

Fillimisht kryeministri i Shqipërisë, Edi Rama kërkoi që të reduktohet formati i takimit, por kjo ishte e papranueshme për qeverinë Kurti, e cila solli vendim për anulim të plotë të saj. Paraprakisht, kreu i qeverisë shqiptare i dërgoi një draft-statut për Asociacionin e komunave me shumicë serbe SHBA-së, Francës dhe Gjermanisë, pa konsultuar fare as pushtetin e as opozitën në Kosovë.

Në lidhje me këtë, Kurti tha se Rama duhet t’ia dorëzojë propozimin e tij presidentit të Serbisë, Aleksandar Vuçiç në takimin e Ballkanit të Hapur, por si propozim për Luginën e Preshevës, e jo për Asociacionin e serbëve në veri.
“Nuk kam dyshim që Rama që beson se propozimi i tij është i mirë, dhe duke qenë kështu atëherë krejt që unë propozoj është që kryeministri Edi Rama këtë propozim t’ia prezantojë presidentit të Serbisë më së largu në takimin e radhës të Ballkanit të Hapur për shqiptarët në Preshevë e Bujanoc.

Pra, pa dyshim që kryeministri Rama beson që ky është model i mirë, pra do të duhej t’ia bënte si propozim Vuçiçit për shqiptarët në Luginën e Preshevës. Propozimi im është që duke besuar në atë që beson kryeministri Edi Rama që modeli i tij është i mirë, në vend se të propozohet për serbët në Kosovë, t’ia propozojë Beogradit në Serbi”, tha Kurti.

Raportet Rama-Kurti nuk u zbutën edhe kur kryeministri i Shqipërisë, Edi Rama njoftoi në një farë mënyre se ka hequr dorë nga “Open Ballkani” duke e shpallur të mbyllur dhe se do t’i përkushtohet Procesit të Berlinit. Kurti refuzoi ta mirëpresë Ramën në Prishtinë, në kuadër të turneut të tij rajonal. Ky refuzim u përcoll me komente ironike nga Rama, që edhe më tepër thelluan hendekun mes tyre, gjë që dëshmon edhe refuzimi i sotëm i kryeministrit Kurti për të shkuar në Tiranë, shkruan Zhurnal.

Shqiptarët e Maqedonisë preferojnë raporte të mira mes Tiranës dhe Prishtinës
Bindja e shumicës së shqiptarëve të Maqedonisë së Veriut është se në këtë “konflikt” Rama-Kurti, e drejta është në anën e kryeministrit kosovar edhe pse në shikim të parë duket se partia më e madhe shqiptare, BDI ka raporte më të afërta me PS-në e Ramës, kurse partitë tjera me Vetëvendosjen e Kurtit.

Sado që shqiptarët e Maqedonisë së Veriut që moti shprehin rezerva shkaku i raporteve të Ramës me presidentin serb, Aleksandar Vuçiq dhe simpati të qarta për kryeministrin kosovar, Kurti, megjithatë ata dëshirojnë që politikat zyrtare të Tiranës dhe Prishtinës të jenë në një linjë mes vete, pa dallime thelbësore, siç po ndodh kohën e fundit. Shqiptarët e Maqedonisë së Veriut nuk preferojnë të sillen në situatë që të zgjedhin me Ramën ose me Kurtin, me Tiranën ose Prishtinën, me Shqipërinsë ose me Kosovën, shkruan Zhurnal.

Në këtë frymë zatën ishte edhe iniciativa e kryetarit të Aleancës për Shqiptarët, Arben taravari, i cili ofroi ndërmjetësimin e tij për një takim në Shkup mes Edi ramës dhe Albin Kurtit, por kjo iniciativë jo që nuk është realiuar, por ende nuk as përgjigje zyrtare.

/Zhurnal