Kadri Limani: Kërçova në hall !

Secili ka mendimin e vet, por si duket do merremi vesh, që të mos merremi vesh.
Shumë me thone se nëse nuk shkojmë të votojmë F.D., atëherë nuk jemi patriotë. Pikë së pari, koha e patriotizmit ka mbaruar që nga viti 2001. Sot, për fat të keq, sundon koha e interesit.

Shtrohet pyetja: si mund ta përkrahim një njeri që e ka tronditur vendin me audio-inçizimet? Për ata që i mohojnë se nuk janë të vërteta, nuk e di në cilin shekull jetoni!
Si mund ta arsyetoj unë një udhëtim prej 🇺🇸 rreth $2000 vetëm për të votuar dikë që për 23 vite ka bërë pasuri shume te madhe në kurriz të popullit? Si mund t’ua marr ato para fëmijëve të mi, vetëm që të më quajnë “patriot” sipas disa “ekspertëve”?

Por nëse e votojmë, çfarë shembulli u lëmë fëmijëve tanë? Që zullumi është i pranueshëm në këtë shoqëri dhe për “çështje patriotizmi” falet gjithçka? Nëse ia japim votën, atëherë i vendosim vulën kësaj të keqe që na ka robëruar si shoqëri.

Këtu nuk bëhet fjalë për një njeri të ri që ka gabuar, e fundit të gjithë kemi qenë të rinj dhe kemi gabuar. Por bëhet fjalë për një njeri 51 vjeç, që mund ta llogarisësh plak. Bëhet fjalë për një njeri që ka qenë disa herë kryetar komune dhe ish zëvendësministër i Ministrisë së Punëve të Brendshme, pra dikush që shumë mirë duhet t’i dijë ligjet dhe dënimet për këtë zullum.

Nëse nuk dalim në votime, ndoshta Dr. Aleksandri fiton Kërçovën. Ndoshta kjo edhe duhet të ndodhë, që t’i themi STOP zullumit, njëherë e përgjithmonë. Ndoshta kjo duhet të ndodhë që pas kater vitesh të mbledhim mend dhe të nxjerrim një kandidat që të fitojë qysh në raundin e parë, e jo të vijnë gurbetçarët dy herë për të mbushur xhepat e kryetareve.

Në fund të fundit, gurbetçarët nuk i kanë borxh askujt. Mjaft kontribut kanë dhënë për këtë vend, që të pasurohet vetëm një grusht i vogël njerëzish te paftyre.
Nëse F.D. e humb Kërçovën, atëherë llogari kërkoni tek ai dhe tek A.A., te askush tjeter.

Kërçova ua dha përgjigjen për ndryshim me mbi 8,000 vota. Nuk dëgjuat e as nuk doni të dëgjoni. Vota është e lirë dhe demokratike, koha e presionit dhe frikës ka përfunduar.
Kërçova s’ka nevojë për trima me xhepa plot, por për njerëz me shpirt të pastër.

Ndoshta më mirë një humbje me nder, sesa një “fitore” me turp.
Respekt shkruan polici nga Amerika Kadri Limani

/ms