Ka javë që nuk maten me ditë, por me biseda, njerëz dhe energji. Davosi ishte pikërisht një prej tyre. Shkruan Florim Useini

Isha tejet i nderuar të shoqëroj Ambasadorin e Maqedonisë së Veriut në Bernë Rexhep Demiri në Forumin Ekonomik Botëror në Davos, ku ai shoqëronte delegacionin qeveritar të udhëhequr nga Kryeministri Hristijan Mickoski.

Ishte një javë intensive, por mbi të gjitha e vlefshme. Një javë ku patëm mundësinë të flasim nga afër me kryeministrin për sfidat reale dhe mundësitë konkrete që ka Maqedonia e Veriut për investitorët. Biseda të hapura dhe të lira, pa protokoll, me fokus tek ekonomia, zhvillimi dhe besimi.

Gjatë ditëve në Davos, kënaqësi e veçantë ishte edhe shkëmbimi i ideve me njerëzit që realisht merren me drejtimin strategjik të vendit, si Ministri i Punëve të Jashtme dhe i Tregtisë së Jashtme Timčo Mucunski, Vladimir Peshevski- këshilltar për ekonomi dhe politika zhvillimore dhe ish-zëvendëskryeministër për ekonomi, si dhe Sasho Markovski-këshilltar për politikë të jashtme dhe marrëdhënie ndërkombëtare, së bashku me shumë pjesëtarë të tjerë të kabinetit të kryeministrit. Biseda që ndoshta nuk mbesin vetëm fjalë, por mund të hapin mundësi.

Një ndalesë me shumë domethënie ishte edhe vizita në Shtëpinë e Kosovës, ku takuam Kryeministrin Albin Kurti, Ambasadorin Mentor Latifi, Gjenis Haxhimehmeti , afaristin Esat Lika që na priti me shumë zemërgjerësi, Konzull nderi i Malit të Zi dhe afaristi Naser Alim, gazetarin Faton Faton Salih Salihu dhe shumë personalitete të tjera. Një hapësirë ku fjala shqip, ideja dhe vizioni ndiheshin si në shtëpi.

Gjatë gjithë javës, takuam miq, bashkëbiseduam me personalitete nga vende të ndryshme dhe mbi të gjitha pamë diçka që të mbush me krenari: Davosi ishte i mbushur me shqiptarë.
Këto janë momentet që të bindin se rruga e dialogut, bashkëpunimit dhe përfaqësimit dinjitoz ia vlen. Dhe se kur je aty me qëllim të mirë, gjithmonë hapen dyer.