Jo spital por morg (për çfarë na përgatit udhëheqsia e komunës së Kërçovës ?!)

Kryetari i Komunës së Kërçovës, Fatmir Dehari, ka bërë publike se ka marrë mbështetjen e Qeverisë për të ndërtuar morgun te varrezat ortodokse në vlerë prej 374 000 euro.
Duke dështuar të ndërtoni spitalin dhe duke mos i vendosur filtra adekuat oxhakut të Osllomesë ndoshta edhe e keni me vend kryetar të ndërtoni morg sepse më shume se spitali mund do të na duhet morgu kështu si e keni katandisur shëndetësinë sepse ministrat tuaj nuk arritën të bëjnë atë që për më shumë se 20 vite presin qytetarët e Kërçovës dhe ju nuk e patë të udhës të reagoni si i pari i këtij qyteti në 8 vitet që jeni kryetar dhe të kërkoni me ngulm që ky projekt të përfundojë. Tani më disa herë jemi dëshmitarë që spitali i Kërçovës është bërë vendqëndrim i qenve endacak dhe funksionarët e partisë suaj në pushtetin qendror nuk e panë me prioritet ndërtimin e spitalit, por i dhanë përparësi ndërtimit të morgut.

Ndërtimi i morgut edhe mund të jetë nevojë por menjëherë shtrohet pyetja se përse nuk e ndërtoni në suaza të spitalit që të mund ta shfrytëzojnë të gjithë qytetarët pavarësisht përkatësisë etnike dhe fetare apo besimtarët musliman si gjithmonë do duhet me vetëfinancim të ndërtojnë hapësira të posaçme nëpër xhamitë e tyre.
Alternativa – Dega e Kërçovës nuk mund të qëndrojë indiferente pas asaj që promovoni dhe cilat janë prioritetet e Komunës së Kërçovës.

Nëse na mban mirë memoria z. kryetar ishit ju ai i cili kur ju pyetën nga mërgata se pse nuk e ndërtoni spitalin ju u përgjigjët se nuk është në ingerenca të komunës që është e vërtetë por që mund të bëni presion dhe ta vendosni në prioritetet e kërkesave tuaja dhe nevojave të qytetarëve këtë nuk mund ta mohoni apo pushtetarët e subjektit tuaj kanë mjete të shërohen në spitale private dhe kjo juve ju mjafton.

Sigurisht se kur jemi tek prioritetet 374 000 euro do mjaftonin për një qendër për përkujdesjen e qeneve endacak dhe nuk do shndërrohej qyteti ynë në kope qensh. E kuptojmë se afrohen zgjedhjet dhe në euforinë e punëve të cilët jeni duke i ndërmarrë prioritet kanë poenët politike më shumë se nevojat praktike dhe kështu është kur të gjitha punët do t’i lëni për në fund të mandatit sepse po të kishit punuar me këtë intensitet 8 vitet e kaluara do ia kishim kaluar edhe Monakos dhe Monte Karlos por ndoshta edhe ua kemi kaluar por për numrin e kazinove dhe bastoreve për kokë banori.

I bëjmë thirrje Kryetarit të Komunës së Kërçovës që të ndryshojë prioritet, dhe mbi të gjitha të vendos interesin e qytetarëve të cilët kanë nevojë për SPITALIN dhe jo për morgun!
Inkurajojmë rininë dhe intelektualët si dhe mërgatën të cilët shumë mirë e dinë se si duhet të funksionojë një komunë, që tani është koha të flasin për atë çfarë duan dhe presin nga kryetari i ardhshëm si dhe me aktivizimin dhe idetë e tyre të bëjnë presionin e duhur që Kërçova të fitojë atë që meriton.

Nuk kemi harruar edhe problemin e madh me të cilin ballafaqohen tani më banorët e fshatrave shqiptare me ujin e pijshëm për çka do reagojmë veçmas në ditët në vijim ashtu si edhe për prioritetet tjera të Kërçovës.
Kërçovë, 16.7.2021 ALTERNATIVA – Dega Kërçovë