Jeta – Amanet i Dashurisë dhe Mirënjohjes. Shkruan Fatmir Limani

JETA!
Është punë, përkushtim dhe flijim; mbi të gjitha është detyrim që, përmes veprave tona në këtë botë, të synojmë parajsën e përtejbotshme.
Mundësia e vetme për ta arritur këtë është dashuria e falur me përkushtim ndaj prindërve, familjes dhe mbarë njerëzimit, deri në ditën e ndarjes nga ky nënqiell.

Të falim në këtë botë mirësi, e cila do t’u shërbejë atyre që janë në nevojë: të varfërve, të pambështeturve, të pafatëve. Mbi të gjitha, të jetojmë me ndershmëri e përkushtim, që të arrijmë të vdesim vetëm njëherë e jo përpërherë.

Në këtë janar, kur kaloj kufirin e shënimit të gjysmë shekullit jetë, ndihem thellësisht mirënjohës për secilin prej jush që më kujtoi përmes vargjeve të lindura nga zemra. Fjalët tuaja janë dhuratë e çmuar, kujtim që mbetet dhe forcë për të ecur më tej me përulësi.

Në heshtje, e sidomos përpara shprehjes së hidhërimit e gëzimit në publik, është mirë të kujtojmë me çfarë ndjenje lexohen vargjet nga nënat tona.
E shtrenjtë-shenjta Nënë, mirënjohje deri në përulësi që më solle në këtë jetë dhe më edukove me virtytin e mirësjelljes.

Mirënjohje për të gjithë ju që, me urimet tuaja, më dhatë ndjesinë e respektit dhe dashurisë njerëzore.
Gëzofshi ditë të shëndetshme, të lumtura dhe të begata, pranë familjeve tuaja dhe gjithçkaje që i jep vlerë jetës.
Ju falënderoj me gjithë shpirt.
F. B. L.

/tvgurra