Javën e ardhshme kthehet dimri në Zvicër..

Temperaturat e larta, pothuaj verore, të fundit të marsit e fillimit të prillit në Zvicër, do të kenë një përfundim të shpejtë dhe dramatik.
Nga e mërkura e deri më sot, në lokalitete të ndryshme të Zvicrës, zhiva në termometër është ngritur shpesh edhe në 25 gradë.

Ndërkaq, qysh gjatë ditëve të Pashkëve do të fillojë të ndjehet ftohja e ajrit. Por, ndryshimi i vërtetë do të vijë nga nata e të hënës, në javën që vjen, bën të ditur meteonews.ch
Kështu, në javën e ardhshme, pritet që bora të “zbresë” edhe në ultësira dhe të ketë acar të fortë.

Të hënën në mbrëmje, pritet të vijë një front i ftohtë, i cili sjell ajër dukshëm më të freskët në Zvicër dhe regjion, transmeton albinfo.ch. Kështu, edhe “pragu” i dëborës do të zbresë poshtë, në ultësira.

Të martën dhe të mërkurën, temperaturat maksimale do të bien në nivelin midis 3 dhe 6 gradëve. Ngrica të mëdha duhet të priten gjatë netëve.

Nëse do të ketë mot të kthjellët, gjë që është mjaft e mundshme, temperaturat mund të bien në rreth -5 gradë, përcjell albinfo.ch raportimin e Meteonews.ch. Dëmtimi nga ngricat është shumë i mundur.

/albinfo