Izraeli nuk ndalet sulmon edhe Katarin ! (VIDEO)

Tensionet në Lindjen e Mesme kanë hyrë në një fazë të re pas një sulmi të raportuar të Izraelit në kryeqytetin e Katarit, Doha, duke shënjestruar udhëheqës të lartë të Hamasit. Sipas dëshmive në terren dhe raportimeve të mediave ndërkombëtare, shpërthime të shumta u dëgjuan në Doha, ndërsa pamjet tregojnë re tymi që ngrihen mbi ndërtesat e qytetit.

Ushtria izraelite konfirmoi zyrtarisht se kishte kryer një “sulm të synuar kundër udhëheqjes së lartë të organizatës terroriste Hamas”, por nuk dha detaje mbi vendndodhjen e saktë të operacionit. Sipas një burimi të cituar nga Channel 12 në Izrael, objektivi i sulmit ishin figurat kyçe të Hamasit, përfshirë Khalil al-Hayan dhe Jabari, të cilët po qëndronin në Doha si pjesë e ekipit negociator të organizatës.

Tymi ngrihet pas disa shpërthimeve që u dëgjuan në Doha, Katar, më 9 shtator 2025.
Burime të afërta me Hamasin, thanë se anëtarët e ekipit negociator ishin në shënjestër të këtij operacioni gjatë një takimi të mbajtur në kryeqytetin e Katarit. Ndërkohë, vetë zyrtarët e Hamasit konfirmuan se nuk kanë qenë të përfshirë në negociata indirekte me Izraelin që nga muaji korrik.

Qeveria e Katarit reagoi ashpër, duke e quajtur sulmin një “akt frikacak dhe shkelje flagrante të ligjit ndërkombëtar”. Përmes një deklarate zyrtare, Ministria e Jashtme e Katarit theksoi se “nuk do ta tolerojë këtë sjellje të pamatur të Izraelit dhe ndërhyrjen e vazhdueshme në sigurinë e rajonit”, duke shtuar se një hetim i nivelit më të lartë është në zhvillim e sipër.

Në një tjetër zhvillim të bujshëm, një zyrtar izraelit, duke folur për Channel 12, pohoi se Presidenti i SHBA-së, Donald Trump, ka dhënë “dritën jeshile” për sulmin ndaj objektivave në Katar. Nëse konfirmohet zyrtarisht, kjo do të përfaqësonte një moment të paprecedentë në marrëdhëniet ndërkombëtare dhe në rolin e SHBA-së në rajon.

Tymi ngrihet pas disa shpërthimeve që u dëgjuan në Doha, Katar, më 9 shtator 2025.
Ndërkohë që autoritetet qeveritare në Katar po vazhdojnë hetimet dhe nuk dihet ende zyrtarisht nëse ka viktima, sulmi ka ngritur shqetësime serioze për sigurinë rajonale dhe mund të ndikojë negativisht në përpjekjet për negociata paqeje në Gazë.

Ky është rasti i parë i raportuar i një sulmi izraelit në territorin e Katarit, një shtet që historikisht ka mbajtur një rol ndërmjetësues në konfliktin izraelito-palestinez. Tensionet pritet të rriten në ditët në vijim, ndërsa bota pret reagime të mëtejshme nga aktorët ndërkombëtarë.

VIDEO:

/joq