Ilaçi i ri revolucionar ul sheqerin në gjak dhe djeg yndyrën pa humbur muskuj

Një studim i ri i publikuar në revistën Cell sjell shpresë për personat me diabet të tipit 2 dhe obezitet. Studiues nga Instituti Karolinska dhe Universiteti i Stokholmit kanë zhvilluar një ilaç në formë tablete që ul sheqerin në gjak dhe rrit djegien e yndyrës, pa ulur oreksin dhe pa dëmtuar masën muskulore.

Ndryshe nga barnat si Ozempic, që veprojnë përmes trurit dhe ulin oreksin, ky ilaç vepron drejtpërdrejt në muskuj. Ai bazohet në një beta-2 agonist të përmirësuar, që ndihmon kontrollin e glukozës pa efekte negative në zemër.

Testimet te kafshët dhe faza e parë klinike te njerëzit treguan rezultate pozitive dhe tolerancë të mirë, pa probleme serioze shëndetësore. Studiuesit theksojnë se ruajtja e masës muskulore është kyçe për shëndetin metabolik dhe jetëgjatësinë.

Ilaçi mund të përdoret vetëm ose në kombinim me barnat GLP-1 dhe pritet të testohet më tej në studime klinike më të mëdha. Nëse rezultatet konfirmohen, ai mund të sjellë një qasje të re dhe më të sigurt në trajtimin e diabetit dhe obezitetit.

/koha