Homazh nga kastriotasit e tij për Prof.Halim Purellkun. Zërin e urtësisë dhe maturisë të historisë sonë.

Manifestimit tonë: “Thesari që na bashkon”, më 02 mars në këtë ditë të shenjtë historike kur në Kuvendin e Lezhës u vulos bashkimi i principatave shqiptare i bashkohet një ndjesi dhimbjeje dhe krenarie njëkohësisht. Në këtë ditë që simbolizon unitetin dhe qëndresën tonë kombëtare, nga gjiri i historisë sonë shkëputet një thesar i saj, prof. Halim Purellku. I cili nuk ishte thjesht një studiues, por dhe një zë i kujtesës sonë.

Një rojtar i së vërtetës historike dhe frymëzim për brezat që besojnë se kombi jeton përmes dijes, sakrificës dhe përkushtimit. Kështu, ikja e Profesor Halim Purellkut, kastriotasit nga Sërbica e Kërçovës, për të gjithë ne paraqet një humbje të madhe dhe të pazëvendësueshme.

Ai do të mbetet në kujtesën tonë si një njeri i urtë, i dashur i përkushtuar dhe kontribues i çmuar i shoqërisë sonë në fushën e historisë. Në cilësinë e afërsisë familjare, si pjesëtar i të njëjtit trung të vendbanimit tonë, por edhe si anëtar shkencor që ishte i ekipit tonë në realizim e sipër të monografisë: “Sërbica e Kastriotasëve – Thesari që na Bashkon”, ndajmë dhimbjen e thellë për humbjen e Prof. Halim Purellkut. Me largimin e tij, historia jonë humb një shërbëtor të përkushtuar, por ne fitojmë një amanet.

Ta ruajmë dhe ta çojmë përpara thesarin që na bashkon. Sepse njerëz si ai nuk ikin, ata mbeten dritë në kujtesën tonë kolektive. Në emër të Koordinatorit të Manifestimit: “Thesari që na Bashkon”, përcjellim ngushëllimet tona më të sinqerta familjes, farefisit, kolegëve, miqve dhe dhjetëra gjeneratave që ai i pajisi me dije dhe dinjitet. Me pikëllim nga Bekim Adili.

/tvgurra