Habitet Mickoski: Nëse ke shit arë pse i shtin parat në murë ?

Kryeministri Hristijan Mickoski sonte, në një paraqitje në televizionin “tv21”, u ndal te rasti i 350 mijë eurove që policia dhe hetuesit e OJQ GOKK i gjetën të murosura në kuzhinën e prindërve të gjyqtarit të Apelit të Shkupit, Gjoko Ristov.

Duke folur për ngjarjen, Mickoski theksoi se nuk dëshiron të komentojë nga pozita e kryeministrit, por si qytetar. Ai theksoi se nuk e ka të qartë pse paratë, për të cilat pretendohet se rrjedhin nga shitja legale e një are toke, do të ruheshin të murosura në mur, kur ekzistojnë shumë mënyra të zakonshme dhe ligjore për ruajtjen e tyre.

“Nuk dua të shndërrohem në gjyqtar, as të kritikoj. Por, si njeri, vërtet më erdhi keq ta shihja këtë. Edhe nëse është e vërtetë se bëhet fjalë për një arë të shitur në mënyrë legale dhe se gjithçka ka kaluar përmes procedurave ligjore, nuk e kuptoj pse ato para do të gjendeshin të murosura në mur. Nëse janë të pastra, ka shumë mënyra konvencionale për t’i ruajtur. Nuk ka as arsye e as shkak që kjo të bëhet në këtë mënyrë”, deklaroi Mickoski.

Ai vlerësoi se arsyetimi për origjinën dhe mënyrën e ruajtjes së parave i duket jo bindës, por theksoi se fjalën përfundimtare duhet ta kenë institucionet kompetente.
“Mendoj se alibia është pak e cekët, por ua lë organeve gjyqësore ta thonë fjalën e tyre”, shtoi kryeministri.

/ms