Gjithnjë e më pak njerëz në Zvicër duan të zhvendosen !?

Në vitin 2024, vetëm 9.3% e popullsisë në Zvicër u zhvendos, niveli më i ulët në mbi dhjetë vjet. Që nga viti 2020, numri i lëvizjeve brenda vendit ka rënë nga 769 000 në rreth 697 000. Rreth tre të katërtat e njerëzve u zhvendosën brenda të njëjtit kanton, ndërsa vetëm 16% ndërruan kanton dhe 13% u larguan jashtë vendit. Vetëm 2% kaluan në një rajon tjetër gjuhësor.

Një nga arsyet e mundshme për rënien e lëvizjeve është rritja e çmimeve të qirave të reja, veçanërisht në zonat urbane. Kjo prek më shumë të rinjtë, të sapoardhurit dhe migrantët.

Shkalla më e lartë e zhvendosjeve u regjistrua në Basel-Stadt dhe Neuchâtel, ndërsa më e ulëta në Nidwalden dhe Obwalden. Banorët urbanë lëvizin më shpesh se ata ruralë. Ndër qytetet më të mëdha, Freiburg dhe St. Gallen kryesuan listën për lëvizshmëri.

Të rinjtë 20–35 vjeç janë grupi më i lëvizshëm, ndërsa fëmijët nën dy vjeç shpesh lëvizin së bashku me familjet. Beqarët dhe shtetasit e huaj lëvizin dukshëm më shpesh se të martuarit dhe qytetarët zviceranë.

Njerëzit që jetojnë në ndërtesa apartamentesh lëvizin dy herë më shpesh se ata në shtëpi njëfamiljare, dhe sa më i vogël apartamenti, aq më e lartë gjasa për zhvendosje. Lëvizjet shpesh lidhen me ndryshimin e madhësisë së banesës: familjet rriten hapësirën, ndërsa të rinjtë dhe personat mbi 50 vjeç zgjedhin banesa më të vogla. Në përgjithësi, zhvendosja nga qyteti në fshat rrit hapësirën e banimit, ndërsa e kundërta e zvogëlon atë.

/ms