Gjermanët harxhojnë gjithnjë e më pak! Kan frikë nga inflacioni.

Gjermanët janë gjithnjë e më të shqetësuar për shkak të krizës së zgjatur ekonomike dhe pasigurisë së përgjithshme, për këtë arsye e hapin portofolin gjithnjë e më rrallë – më së paku që nga koha e krizës financiare botërore, tregon edicioni më i fundit i barometrit të disponimit të konsumatorëve.

Barometri i instituteve kërkimore të tregut nga Nyrnbergu, GfK dhe NIM, tregon se qytetarët gjermanë prej muajsh po orientohen gjithnjë e më shumë drejt kursimit dhe po përmbahen nga shpenzimet, transmeton agjencia dpa.

GfK dhe NIM për muajin janar parashikojnë një rënie shtesë të indeksit të disponimit të konsumatorëve prej 3,5 pikësh, në minus 26,5. Në të njëjtën kohë, indeksi i kursimit në dhjetor është rritur në 18,7 pikë, që është vlera më e lartë në më shumë se 15 vjet.

“Këto nuk janë sinjale pozitive për ekonominë në prag të Krishtlindjeve, ndërsa disponimi i konsumatorëve paralajmëron edhe një fillim të dobët të vitit të ardhshëm”, deklaroi eksperti i NIM-it, Rolf Birkle.

GfK dhe NIM çdo muaj zhvillojnë anketa mes qytetarëve për të llogaritur indeksat që tregojnë gatishmërinë për shpenzim, përkatësisht për kursim.

Një nga segmentet e hulumtimit të rregullt është edhe vlerësimi i të anketuarve për të ardhurat e tyre personale gjatë 12 muajve të ardhshëm.

Në dhjetor, treguesi për këto pritshmëri ka rënë për të tretin muaj radhazi dhe tani qëndron në minus 6,9 pikë. Analistët e lidhin këtë trend me frikën në rritje nga inflacioni.

/ms