Gjeneva, kantoni më i pasur në Zvicër..!?

Gjeneva ka dalë si kantoni më i pasur në Zvicër për vitin 2024, duke shënuar një tepricë mbresëlënëse prej 541 milionë frangash, duke lënë pas kantonet që tradicionalisht kryesonin ekonominë zvicerane, si Zug, Cyrih dhe Basel-City, shkruan The Local.

Kjo performancë e jashtëzakonshme financiare e ka vendosur Gjenevën në një pozitë të re udhëheqëse brenda sistemit të solidaritetit të Zvicrës, të njohur si “barazimi financiar”. Sipas këtij mekanizmi, kantonet më të pasura kontribuojnë me fonde për të mbështetur kantonet më të varfra, me qëllim që të zvogëlohet pabarazia e të ardhurave mes rajoneve të ndryshme, transmeton albinfo.ch.

Bazuar në këto të dhëna, në vitin 2028, Gjeneva pritet të bëhet kontribuuesi më i madh në këtë sistem, me një pagesë prej 602 milionë frangash që do të shkojë për të ndihmuar kantonet më pak të zhvilluara ekonomikisht.

Fondet e barazimit financiar përdoren nga kantonet “përfituese” për të financuar shërbime publike të rëndësishme si spitale, shkolla, dhe infrastrukturë rrugore, duke synuar një zhvillim më të balancuar në mbarë vendin, shkruan The Local.

Ky sukses ekonomik e forcon më tej pozitën e Gjenevës jo vetëm si një qendër financiare ndërkombëtare, por edhe si një shtyllë e rëndësishme e solidaritetit federal zviceran, transmeton albinfo.ch.

/albinfo