Gjatë Ramazanit rekomandohet përdorimi i kripës natyrale..!?

Prof. dr. Coşkun Usta, pedagog në Departamentin e Farmakologjisë Mjekësore të Fakultetit të Mjekësisë në Universitetin Akdeniz, rekomandoi që agjëruesit gjatë Ramazanit të konsumojnë kripë natyrale dhe të pinë ujë në intervale nga iftari deri në syfyr në mënyrë që të rregullojnë ekuilibrin e ujit, kripës dhe sheqerit në trupin e tyre, raporton Anadolu.

Për AA Usta tha se është e rëndësishme që trupi të përshtatet me agjërimin në ditët e para të Ramazanit dhe rekomandoi shmangien e ushqimeve pikante, veçanërisht gjatë syfyrit, për të mos pasur etje gjatë ditës.

“Gjatë syfyrit nuk duhet konsumuar shumë ushqime me sheqer. Nëse hamë ushqime me sheqer gjatë iftarit, do të kemi një rritje serioze të sheqerit në gjak, sekretim të insulinës dhe si pasojë, krizë urie. Gjatë iftarit mund të hani pak më rehat, por gjatë syfyrit qëndroni larg ushqimeve me sheqer”, tha Usta.

Ai më tej u shpreh se nuk duhet të ketë mbingarkim të menjëhershëm ndaj ushqimeve gjatë iftarit, se është e rëndësishme të fillohet me hurma për të prishur agjërimin dhe të vazhdohet me supë dhe se është e rëndësishme të mos konsumohen shumë produkte të yndyrshme dhe të pasura me karbohidrate.

Usta u shpreh se ngrënia e tepërt është e rrezikshme për sa i përket hormoneve, nivelit të gjakut dhe sistemit të stresit.

– “Mos e ekzagjeroni me konsumimin e hurmave”
Usta theksoi se hurmat janë ushqim i shëndetshëm dhe vuri në dukje: “Hurmat janë fruta shumë të mira për sa i përket mineraleve që përmbajnë.

Megjithatë, hurmat rrisin rrezikun e abortit tek gratë shtatzëna. Nëse ka gra që janë në rrezik për abort, mos konsumoni shumë hurma, ato mund të shkaktojnë kontraktime dhe rrezik për abortim. Ka edhe një situatë të kundërt, konsumimi i hurmave në periudhën pranë lindjes mund t’ju ndihmojë të keni një lindje më të lehtë”.
Ai tha se është e dobishme që të konsumohen maksimumi 1-3 hurma në ditë dhe se kjo nuk duhet ekzagjeruar.

Duke vënë në dukje rëndësinë e ruajtjes së ekuilibrit të ujit, kripës dhe sheqerit gjatë Ramazanit, Usta u shpreh:
“Nëse jemi duke agjëruar është shumë e rëndësishme të ruajmë ekuilibrin e ujit, kripës dhe sheqerit të trupit tonë. Zemra dhe nervat tona janë organe që punojnë me natrium, kalium dhe magnez.

Prandaj duhet të rregullojmë shumë mirë mineralizimin tonë, ekuilibrin e ujit, kripës dhe sheqerit. Është gjithmonë shumë e dobishme të përdorim kripëra natyrale të parafinuara këtu. Nuk ka rëndësi nëse është kripë guri apo kripë deti”.

Konsumimi i tepërt i ujit në të njëjtën kohë gjatë iftarit shkakton probleme me tretjen, fryrje të barkut dhe mos marrjen e lëndëve ushqyese të nevojshme, tha Usta i cili rekomandoi konsumimin e ujit me intervale nga iftari në syfyr.

/ts