Gaza po “mbytet me qëllim” nga forcat izraelite..!?

Organizata Mjekët pa Kufij (MSF) ka akuzuar forcat izraelite për mbytjen e qëllimshme të Gazës, duke lejuar ndihma minimale si një “mjegullim për të krijuar përshtypjen” se bllokada ka përfunduar, ndërsa në të njëjtën kohë po godet spitalet dhe klinikat me sulme të vazhdueshme.

“Vendimi i autoriteteve izraelite për të lejuar një sasi qesharake të ndihmës pas muajsh të një rrethimi të hekurt tregon se ata po përpiqen të shmangin akuzat për urinë masive në Gaza, ndërsa në realitet po i mbajnë njerëzit në prag të mbijetesës,” tha Pascale Coissard, koordinator i emergjencave i MSF në Khan Younis.

Ai shtoi se ky është një plan për të “përdorur ndihmën si mjet për përmbushjen e objektivave ushtarake të forcave izraelite.”
MSF raportoi se të paktën 20 qendra mjekësore në Gaza janë dëmtuar ose janë nxjerrë jashtë funksionit pjesërisht apo tërësisht javën e fundit, për shkak të avancimeve tokësore të ushtrisë izraelite, bombardimeve të intensifikuara dhe urdhrave masivë për evakuim.

Në Khan Younis, ekipet e MSF kanë dëgjuar thuajse një sulm izraelit çdo minutë mes orës 06:00 dhe 06:30 të mëngjesit më 19 maj, përfshirë një goditje në Spitalin Nasser – e treta brenda dy muajve – e cila dëmtoi rezervat mjekësore, sipas organizatës.

Ndërkohë, një punonjëse e MSF në Deir el-Balah tha për Al Jazeera se ende nuk ka parë asnjë ndihmë të shpërndarë nga grupi i parë prej nëntë kamionësh që Izraeli lejoi të hyjnë të hënën.
Claire Manera shtoi se po sheh “gra dhe fëmijë që duken sikur nuk kanë ngrënë prej javësh”, dhe se të kequshqyerit po mbushin klinikat në kërkim të ndihmës.

/mesazhi