Fitore e Kosovës. Shkruan ministri Fatmir Limani

Vullneti i shprehur i qytetarëve të Republikës së Kosovës në zgjedhjet e djeshme, ku Lëvizja Vetëvendosje dhe Kryeministri Albin Kurti arritën një mbështetje preliminare 50%, shënon një moment historik për demokracinë. Ky rezultat është pasqyrim i një vullneti të qartë popullor që legjitimon një vizion të ri për të ardhmen e Republikës dë Kosovës.

Përmes procesit zgjedhor, populli i Kosovës dëshmoi pjekuri të lartë politike, duke vërtetuar se besimi te e vërteta dhe integriteti mbeten shtyllat kryesore të mburojës sonë shoqërore. Rezultat që përfaqëson një kontratë të re sociale, ku dinjiteti i qytetarit dhe mirëqenia e tij vendosen në qendër të politikëbërjes institucionale.

I shpreh urimet të përzemërta Kryeministrit Kurti për këtë fitore madhështore. Kjo mbështetje masive, përveçse nderim, është një përgjegjësi e lartë morale dhe shtetërore.
Pushteti që buron nga vullneti i pastër duhet të shërbejë si thirrje për punë dhe përkushtim maksimal ndaj institucioneve dhe interesit publik.

Një mirënjohje e veçantë i takon mërgatës sonë, e cila me pjesëmarrjen e saj masive u bë sërish gardiane e proceseve demokratike dhe dinjitetit të Kosovës. Po ashtu, përgëzoj të gjithë akterët që realizuan një proces zgjedhor model në rajon dhe më gjerë.

Mbetem plotësisht i përkushtuar dhe pres të vazhdojë bashkëpunimi ndërinstitucional me Republikën e Kosovës dhe Maqedonisë së Veriut për jetësimin e projekteve të përbashkëta, të cilat do ta forcojnë rrugëtimin tonë drejt integrimit në familjen europiane.

Me respekt,
Fatmir Beqir Limani, Minister i Politikës Sociale Demografisë dhe Rinisë

/ms