Filipçe “në kafe” te Ahmeti para takimit të liderëve te Mickoski ?

Lideri i opozitës Venko Filipçe i ka propozuar Ali Ahmetit bashkëpunim në një “front opozitar pro-evropian”, ku do të përfshihej edhe BDI-ja. Sipas TV 24, takimi është zhvilluar me kërkesë të Filipçes në Reçicë të Vogël, një ditë para takimit të liderëve më 14 janar me kryeministrin Mickoski.

Takimi ndodhi disa orë para se Këshilli i Përgjithshëm i BDI-së të vendoste që Ahmeti të marrë pjesë në takimin me Mickoskin. Nuk dihet nëse oferta përfshinte edhe bojkotin e takimit. Filipçe e konfirmoi takimin, por pa dhënë detaje.

Një funksionar i lartë i BDI-së konfirmoi se Filipçe ka ofruar bashkëpunim në një front pro-evropian, ndërsa zyrtarisht BDI nuk e konfirmon dhe as e mohon këtë. Ideja për një front të tillë mes LSDM-së dhe BDI-së ishte përmendur edhe më herët, por kishte dështuar.

Ndërkohë, viti 2025 u vlerësua si një nga më stagnuesit për integrimin evropian të Maqedonisë së Veriut, me procesin e anëtarësimit të ngrirë për shkak të ndryshimeve kushtetuese të parealizuara dhe mosmarrëveshjeve me Bullgarinë.

/portalb