Fatmir Limani uron Natën e Kadrit

Në mesin e netëve të bekuara qëndron një natë e veçantë, e mbushur me dritë hyjnore dhe mëshirë të pakufishme:
NATA E KADRIT.
– Nata që vlen më shumë se një mijë muaj, e në të cilën filloi shpallja e Kuranit, duke e bërë atë një moment të madh për njerëzimin dhe një thirrje për reflektim, përulësi dhe kthim drejt së mirës.

Kjo natë është mundësi e çdo besimtari, për të pastruar zemrën, të kërkojë falje dhe të forcojë lidhjen me Krijuesin. Në heshtjen e saj të thellë, njeriu përballet me veten, me ndërgjegjen dhe me shpresën se çdo lutje e sinqertë ngjitet drejt qiellit.

Pas muajit të vetsakrifikimit, durimit dhe përkushtimi të përmbajtjes dhe përpjekjes së besimtarit që të bëhen më i mirë në mendime dhe vepëra, Nata e Kadrit vjen si një dhuratë hyjnore e mëshirës dhe faljes.

Uroj që bardhësia e kësaj nate të ndriçojë zemrat e të gjithë besimtarëve, lutjet t’u pranohen, gabimet t’u falen dhe shpresat të marrin bekim. Lutem që krijuesi t’u pranojë agjërimin, lutjet dhe çdo vepër të mirë të këtij muaji të bekuar.

Nata e Kadrit qoftë për të gjithë një rast mëshire, faljeje dhe begatie. F. B. L.

Shkruan ministri Fatmir Limani në facebook.

/ms