Fatmir Limani nuk do të jetë më ministër !

Tashmë ministri në largim i Politikës Sociale, Demografisë dhe Rinisë, Fatmir Limani ka reaguar publikisht pas largimit nga detyra, duke theksuar se angazhimi i tij në shërbim të qytetarëve do të vazhdojë edhe jashtë funksionit ministror.

Në një shkrim të gjatë të titulluar “Misioni vazhdon”, Limani vlerësoi se posti publik është një përgjegjësi e përkohshme, ndërsa përkushtimi ndaj qytetarëve dhe të rinjve mbetet i pandryshuar.

Ai renditi një sërë arritjesh gjatë mandatit të tij, përfshirë punësime në institucionet e ministrisë, rritjen e pensioneve dhe pagave për kategori të caktuara të punonjësve, ndryshime ligjore në mbrojtjen e fëmijëve, si dhe investime në ndërtimin dhe zgjerimin e kopshteve për fëmijë.

Limani po ashtu deklaroi se gjatë angazhimit të tij është përballur me pengesa dhe sulme politike, por theksoi se ato nuk do ta ndalin në rrugëtimin e tij. Ai falënderoi bashkëpunëtorët për kontributin e dhënë dhe u shpreh se do të vazhdojë të punojë për të rinjtë dhe qytetarët edhe në të ardhmen.

/zhurnal