Fatmir Limani: Kombi është shpirti dhe gjuha është një nga rojtarët e tijë!

Me energjinë e të rinjve, me nuancat kuqezi dhe gjallërinë e traditës, ky vend sot morri një ngjyrë të fortë kombëtare. Këngët, vajet, letërsia gojore dhe gjuha e trashëguar brez pas brezi kanë ruajtur identitetin tonë edhe në kohët më të vështira. Shqipja jonë vazhdon të na lidhë, të na formojë dhe të na bëjë më shumë njerëz, më shumë shqiptarë.

Falë jush të dashur të rinj e të reja, raca jonë nuk do të vdesë. Kombi jonë nuk do të lëngojë. Jeta në këto vise do të gjallojë. Dhe ky vend falë jush merr ngjyrën e veshjes së nëntorit, të festave të kombit, ku ndihemi më shumë shqiptarë se kurrë më parë.

Në nëntor, gjithë vitin, për shekuj e mijëvjeçarë, ndihemi shqiptarë kudo ku flitet shqip, sepse kufijtë e shteteve janë të ndryshueshëm, janë të negociueshëm, por kufijtë e gjuhës, janë të pandryshueshëm.

Shqipen duhet ta flasim e ta shkruajmë njëlloj kudo ku jetojnë shqiptarët. Ka vetëm një shqipe: ajo standarte, nga Saranda në Vermosh, nga Durrësi, në Kërçovë, nga Manastiri në Bllacë, nga Korça në Tetovë, nga Hani i Elezit në Mitrovicë, në Lugine, e kudo ku jetojnë bijtë e shqipes.
E kemi ruajtur standartin e gjuhës në kushte diskriminimi në ish-Jugosllavi. Ndaj nuk ka arsye pse ta cënojmë në kushte lirie si sot.

KOMBI ËSHTË SHPIRTI DHE GJUHA ËSHTË NJË NGA ROJTARËT E TIJ !
Gëzuar pra festën e shpirtit, gëzuar festën e rojes së shpirtit tonë kombëtar, festën e shqipes, kësaj gjuhe zotash e perëndish.
Shqipja nuk ka vdekur, ndaj nuk ka vdekur as kombi jonë, nuk ka vdekur shpirti ynë kombëtar. Shqipja lulëzon, harliset, ngrihet në lartësi e gjerësi, ndaj dhe kombi jonë mbijeton.

Shqipja ka mbijetuar tek arbëreshët, tek arvanitasit, ndaj shqipja sot e folur kudo në botë ku ka shqiptarë, madje dhe në Alaskë apo Australi, do ta ruajë kombin tonë nga zhdukja.
Le të bëjmë disa pyetje, e të lëshojmë disa thirrje për reflektim nga ky vend, ku kemi festuar e gëzuar, apo kemi filluar beteja politike.

● A do ketë shqipja dinjitetin që kishte deri dje, brenda institucioneve ?
Padyshim që do ketë, sepse kemi dhënë fjalën e nderit, dhe askush nuk e ndryshon këtë fitore. Shteti, zyrat, letrat, do ta kenë shqipen njëjtë si më parë.
● A do të kemi me të njëjtin dinjitet edhe flamurin në krye të institucioneve ?
Padyshim që do ta kemi. Unë, bashkë me subjektin që përfaqësoj jemi garantë të kësaj arritje.

Gjuha na bën pra më së shumti shqiptarë, por nuk mjafton vetëm gjuha. Na duhet dhe vetëdija. Duhet ta ruajmë pra vetëdijen kombëtare, që zhvillohet me kulturën, me bashkëjetesën, me betejat në luftë dhe në paqe, për liri, barazi dhe përparim shoqëror.

Ta mësojmë gjuhët e të tjerëve sepse sa gjuhë di, aq herë njeri je ! Nëse ne e mësojmë gjuhët e bashkëkombasve, atëherë lind e drejta t’u themi: mësojeni dhe ju gjuhën tonë.
Kështu do kuptohemi më mirë, do respektohemi më shumë dhe do të grindemi më pak.

Të mos mësosh gjuhën e tjetrit në një realitet multietnik, do të thotë të izolohesh, të vendosësh mure, të shurdhërohesh, të keqkuptohesh, të të pëlqejë vetja edhe kur duhet të jesh kritik ndaj saj..
Nga ky vend, duhet të themi diçka që të jehojë dhe jashtë Kërçovës, për kolegët e të gjitha etnive.
– Të konsolidojmë në mënyrë përfundimtare arritjet etnike dhe të heqim dorë nga betejat për patronizim apo bullizim të tjetrit.

– Të merremi me beteja për mirëqenien e qytetarit, për projekte zhvillimore, dhe jo me beteja të shekullit të shkuar.
Ndjesë që përfitova nga ky moment festiv duke bërë pak politikë, por e gjitha në shqip.
Të flasim e mendojmë shqip, të forcojmë vetëdijen kombëtare;

Të flasim edhe gjuhët tjera, për t’u mirëkuptuar me fqinjin dhe të kultivojmë vetëdijen e shtetit tonë të përbashkët !
● Rroftë Shqipja gjithë vitin, gjithë kohën, gjithë jetën,
● Rroftë nëntori i kombit shqiptar!
Shkruan ministri Fatmir Limani në Facebook.

/ms