Edicioni i 5-të i Uskana Fest do të sjellë katër netë magjike të teatrit në Kërçovë (FOTO)

Nga data 10 deri më 13 dhjetor, çdo mbrëmje, duke filluar nga ora 19:00, në ambientet e Shtëpisë së Kulturës në Kërçovë do të zhvillohen aktivitetet e “Uskana Fest”, festivalit të teatrit që këtë vit shënon edicionin e tij të pestë jubilar. Ky edicion, sipas organizatorëve, vjen si një moment i veçantë për artdashësit, pasi përveç shfaqjeve teatrale të trupave vendore dhe të ftuarve specialë, festivali synon të rikthejë emocionin, energjinë dhe magjinë e skenës përmes një programi të pasur artistik, shkruan Portalb.mk.

Për katër net radhazi, publiku i Kërçovës do të ketë mundësinë të shijojë prodhime teatrore të zhanreve të ndryshme, interpretime të nivelit të lartë dhe krijimtari të re skenike që dëshmon vitalitetin e kulturës sonë. Uskana Fest, në këtë edicion jubilar, vjen si një homazh për teatrin dhe artistët që për vite me radhë e mbajnë gjallë shpirtin kulturor të qytetit.

Rrahim Ramadani koordinator i festivalit, për Portalb.mk tha se edicioni i pestë jubilar i Uskana Fest është dëshmi se edhe në një qytet pa teatër, dashuria për skenën mund të ndërtojë traditë.
“Ky edicion ndër risit e tjera është tejet i rëndësishëm sepse shënon edicionin e pestë jubilar të këtij festivali teatrosh “USKANA FEST”-Kërçovë. E kemi nisur këtë rrugëtim sa të vështirë aq edhe të lezetshëm në vitin 2021 me dëshirën për të promovuar artin e teatrit në qytetin tonë, Kërçova fatkeqësisht është qytet pa teatër dhe si rrjedhojë pamë të arsyeshme që të paktën të kemi një festival teatri ku publiku kërçovarë do ketë mundësi të shijoj artin skenik.

Kemi arritur tani më në edicionin e 5-të, të festivalit me shpresën dhe dëshirën e madhe që kësaj 5-se ti shtohen shumë 0 pas, por le të koncentrohemi te edicioni i sivjetshëm. Dua të theksoj edhe njëherë dëshirën dhe entuziazmin e pakufishëm të vullnetarëve të festivalit që sa vinë e shtohen gjë e cila sot e pesë vite me radhë neve si organizator na gëzon shumë, qytetarëve të cilët na takojnë rrugëve dhe na pyesin se kur do mbahet këtë vit dhe njerëzit të cilët përveshin mëngët dhe ndihmojnë pa u kursyer”, tha Ramadani.

Ai shtoi se edicioni i sivjetshëm i Uskana Fest merr një ngjyrë të veçantë, sepse për herë të parë skena do të zbukurohet edhe me një shfaqje për fëmijë.
“Këtë vit do ta zbukuroj festivalin edhe shfaqja për fëmijë gjë që e veçon këtë edicion. Spektatori kërçovarë këtë vit do ketë mundësin të ndjek një laramani shfaqesh nga teatro të ndryshme të vendit, jemi përpjekur që të servojmë nga të gjitha zhanret e teatrit në mënyrë që të kënaqim shijet e gjithë secilit”, tha Ramadani.

Festivali u mbështet nga Ministria e Kulturës së RMV-së dhe Komuna e Kërçovës, dy institucione që me përkrahjen e tyre e bëjnë të mundur vazhdimin dhe rritjen e Uskana Fest. Kjo mbështetje është dëshmi e rëndësisë që ky festival ka fituar ndër vite dhe e besimit se arti skenik duhet të mbetet një pjesë e gjallë e jetës kulturore të Kërçovës.

FOTO:

/portalb