“Dyert e Komunës u mbyllën”, Syarta Saliju-Osmani i kundërpërgjigjet kryetarit të Kërçovës !

Debati mes kryetarit të Komunës së Kërçovës, Aleksandar Jovanovski dhe këshilltares komunale Syarta Saliju Osmani është përshkallëzuar pas reagimeve për mbylljen e dyerve të komunës gjatë një kontrolli të brendshëm ndaj të punësuarve, shkruan Gazeta Flaka

Kryetari Jovanovski, përmes një reagimi publik në gjuhën maqedonase, pranoi se hyrja në objektin e komunës ishte bllokuar për rreth 10 minuta, duke arsyetuar se bëhej fjalë për një “kontroll të jashtëzakonshëm” të pranisë së administratës në vendin e punës.

Ai deklaroi se masa ishte ndërmarrë për të parandaluar, siç tha, “manipulimet dhe falsifikimin e prezencës”, duke shtuar se të punësuarit “duhet ta fitojnë pagën me punë dhe produktivitet”.

Por reagimi i këshilltares Syarta Saliju-Osmani ishte i menjëhershëm dhe kritik ndaj mënyrës së funksionimit të komunës.
“I nderuar kryetar, për dallim nga ju, unë zgjedh të respektoj dygjuhësinë në komunën tonë”, shkroi ajo, duke e nisur reagimin edhe në gjuhën maqedonase.

Saliju-Osmani theksoi se vetë kryetari e konfirmoi mbylljen e dyerve të komunës, ndonëse kontrolli i të punësuarve, sipas saj, kryhet tashmë në mënyrë elektronike me kartela hyrëse.

“Ju vetë e konfirmuat: dyert e komunës u mbyllën për një periudhë të pacaktuar dhe kontrolli i të punësuarve kryhet elektronikisht me kartelë. Atëherë, cili është qëllimi i vërtetë i kësaj mase?”, pyeti ajo publikisht.

Këshilltarja nënvizoi se reagimi i saj nuk ishte politik, por i bazuar në ankesat e qytetarëve.
“Unë reagova duke u bazuar në ankesat e qytetarëve, për ata jam zgjedhur”, deklaroi Saliju-Osmani, duke shtuar se praktikat e mëparshme nuk mund të përdoren si arsyetim për veprime që dëmtojnë transparencën dhe qasjen e qytetarëve në institucion.

Ajo insistoi se debati duhet të zhvillohet në Këshillin Komunal, aty ku përfaqësuesit janë mandatuar nga qytetarët, e jo përmes sulmeve personale në rrjete sociale.

/Gazeta Flaka