Dy qen të racës “rotvaljer” sulmuan një nënë me dy fëmijë në Drugovë të Kërçovës !

Një nënë me dy fëmijë të mitur është sulmuar nga dy qen të racës “rotvajler” në fshatin Drugovë të Kërçovës, ndërsa po shëtiste me fëmijët. Ngjarja, sipas informacionit të publikuar, ka ndodhur të premten, më 22 maj, transmeton Portalb.mk.

Gruaja, në një postim në rrjetet sociale, ka deklaruar se qentë papritur kanë filluar të lehin në mënyrë agresive dhe t’u afrohen, pas së cilës ajo ka marrë në krah fëmijën më të vogël dhe është përpjekur të mbrojë edhe fëmijën tjetër. Gjatë sulmit, sipas dëshmisë së saj, njëri nga qentë e ka tërhequr fëmijën, i cili ka rënë në tokë, dhe më pas është shfaqur edhe qeni i dytë.

Fëmija ka pësuar lëndime trupore, të cilat janë konstatuar dhe trajtuar në Qendrën Mjekësore në Kërçovë. Rasti është raportuar në MPB nga shërbimi i urgjencës, ndërsa nëna ka dhënë deklaratë në stacionin policor.

Deri tani nuk janë publikuar informacione shtesë nga institucionet kompetente nëse është ndërmarrë ndonjë veprim ndaj pronarit të qenve dhe çfarë masash do të merren. Rasti sërish hap çështjen e kontrollit të qenve të rrezikshëm, përgjegjësisë së pronarëve dhe sigurisë në hapësirat publike, veçanërisht kur në rrezik janë fëmijët.

/portalb