Diaspora e Kërçovës vazhdon me kërkesat për unitet..!?

Diaspora dhe qytetarët kërkojnë unitet dhe maturi nga partitë politike për Kërçovën
Në prag të zgjedhjeve lokale, diaspora shqiptare dhe qytetarët e Kërçovës i drejtojnë një thirrje të qartë partive politike: tregoni unitet dhe maturi politike.

Nëse dalin më shumë kandidatë shqiptarë për kryetar të Komunës së Kërçovës, rreziku nuk qëndron te vetë kandidimi, por te ndarja e votës shqiptare, sidomos kur kandidatët garojnë kundër njëri-tjetrit dhe gëzojnë mbështetje të konsiderueshme.

Kërçova është një komunë me përbërje të përzier etnike dhe me një histori të balancuar të garave zgjedhore.
Nëse vota shqiptare shpërndahet mes disa forcave politike, ekziston rreziku real që kandidati maqedonas të fitojë me shumicë relative – pavarësisht se shqiptarët janë shumicë në këtë komunë.

Rreziku i vërtetë nuk qëndron te shumëkandidatura, por te mungesa e koordinimit, vizionit të përbashkët dhe strategjisë politike.
Zgjedhjet lokale janë një moment i ndjeshëm, që kërkon përgjegjësi të lartë kombëtare.

Është thelbësore që partitë shqiptare të ulen në një tryezë të përbashkët dhe të dalin me një kandidat unik, që përfaqëson interesin e përbashkët të qytetarëve shqiptarë.
Vetëm përmes unitetit ruhet përfaqësimi, ndikimi dhe zhvillimi i Kërçovës. Zhgënjimi i qytetarëve dhe i diasporës do të jetë i madh nëse përçarja politike i hap rrugën humbjes së komunës.

/tvgurra