Delegacion nga komuna Bayrampaşa e Stambollit viziton Kërçovën

Një delegacion nga komuna Bayrampaşa e Stamboll, i udhëhequr nga z. Eyüp Uçak, qëndroi për vizitë në Kërçovë.
Gjatë qëndrimit të tyre, delegacioni vizitoi edhe Fan Club të Fenerbahçe në Kërçovë, te “Masaro Legenda”, një vend që është bërë tashmë pikë takimi për shumë delegacione dhe mysafirë që vijnë nga Turqi.

Z. Eyüp Uçak, ish-kryetar i komunës Eyüpsultan dhe ish-drejtori i parë i Cevahir Holding në Shkup, njihet si një biznesmen i suksesshëm me prejardhje nga fshati Lazhan. Ai theksoi me krenari lidhjen e tij me vendlindjen, duke shtuar se nëna e tij është shqiptare nga fshati Zhitoshë.

Gjatë qëndrimit të tij, ai u shpreh se pavarësisht se jeton prej vitesh në Turqi, vendlindjen dhe rrënjët e tij nuk i ka harruar kurrë dhe gjithmonë i kujton me respekt dhe mall.

Ai gjithashtu theksoi se një komunitet i madh kërçovarësh jeton në Bayrampaşa, duke shtuar se në Turqi jetojnë rreth 7 milionë njerëz me prejardhje shqiptare, të cilët – siç u shpreh ai – njihen si “Arnautë”, njerëz të fjalës dhe të besës.

/tvgurra