Çfarë ndodhi pas zgjedhjeve? Shkruan Albert Sadiku

Pas përfundimit të zgjedhjeve, pritej reflektim, përgjegjësi dhe transparencë. Por ajo që ndodhi ishte e kundërta.
Struktura e degës, e shndërruar në shtab elektoral në atë periudhë, zgjodhi heshtjen. Asnjë analizë serioze, asnjë llogaridhënie për humbjen, asnjë përgjegjësi morale apo politike për dështimin e pësuar.

Në vend që të ballafaqoheshin me realitetin dhe me anëtarësinë, u zgjodh një rrugë e lehtë dhe e imponuar, organizimi i një darke të zbehtë “ngushëllimi”, një akt formal që synonte të mbulonte dëmin dhe të fshihte peshën e përgjegjësisë.
Ishte një përpjekje për të mbyllur kapitullin pa e lexuar fare atë.

Por problemi nuk përfundon këtu. Të njëjtët individë, tashmë të konsumuar politikisht dhe të harruar nga anëtarësia dhe opinioni, sot paraqiten sërish si organizatorë të aktivitetit të radhës. Pa kredibilitet, pa vizion dhe pa një platformë të qartë veprimi, ata vazhdojnë të sillen sikur asgjë nuk ka ndodhur.

Më shqetësuese se kaq është përpjekja për riciklim politik. Figura që për më shumë se dy dekada kanë mbajtur peshën e funksionarit, shpeshherë në mënyrë indirekte dhe pa legjitimitet të plotë, sot përpiqen prapa kuintave të imponojnë delegatë të kontrolluar, vetëm për të nxjerrë sërish vetveten në sipërfaqe. Kjo qasje nuk është reformë, nuk është rilindje, por vazhdimësi e një mentaliteti që ka prodhuar humbje dhe stagnim.

Pa reflektim të sinqertë, pa përgjegjësi reale dhe pa hapje ndaj brezit të ri dhe mendimit ndryshe, çdo aktivitet mbetet formalitet, çdo organizim mbetet bosh dhe çdo premtim tingëllon i konsumuar. Koha kërkon ndryshim thelbësor, jo riciklim të së shkuarës.

/tvgurra