Çfarë duhet të dini nëse udhëtoni në Zvicër këtë verë?

Vera 2026 pritet të jetë një nga sezonet më të ngarkuara për turizmin në Zvicër. Autoritetet dhe operatorët e transportit u rekomandojnë udhëtarëve të planifikojnë paraprakisht itineraret e tyre, pasi trafiku i shtuar, temperaturat e larta dhe punimet në infrastrukturë mund të ndikojnë në udhëtim.

Një nga sfidat kryesore pritet të jetë fluksi i madh në rrugët drejt jugut të vendit, veçanërisht në tunelin e Gotthardit, ku gjatë fundjavave dhe periudhave të pushimeve mund të krijohen kolona të gjata automjetesh. Udhëtarëve u këshillohet të shmangin orët e pikut ose të përdorin itinerare alternative, shkruan The Local, transmeton albinfo.ch.

Edhe transporti hekurudhor pritet të jetë shumë i ngarkuar, sidomos në linjat drejt destinacioneve turistike në Alpe dhe pranë liqeneve. Për këtë arsye rekomandohet rezervimi i biletave dhe vendeve paraprakisht, veçanërisht për grupet dhe udhëtimet në fundjavë.

Ndërkohë, vala e fundit e të nxehtit ka bërë që autoritetet të këshillojnë udhëtarët të mbajnë me vete ujë, të shmangin aktivitetet fizike gjatë orëve më të nxehta të ditës dhe të kontrollojnë rregullisht parashikimin e motit, pasi në disa rajone priten edhe stuhi të forta pas temperaturave ekstreme.

Ekspertët e turizmit këshillojnë gjithashtu që rezervimet për hotele, atraksione turistike dhe transport të bëhen sa më herët, pasi destinacionet më të njohura në Zvicër vazhdojnë të tërheqin një numër rekord vizitorësh gjatë sezonit veror.

/albinfo