Çfarë dihet deri tani për virusin Nipah ?

Dy raste të konfirmuara të virusit Nipah në Indi kanë ngritur alarm ndërkombëtar, transmeton Portalb.mk nga Euronews.
India ka konfirmuar dy raste të virusit Nipah në Bengalën Perëndimore, rajon në lindje të vendit që kufizohet me Bangladeshin, Butanin dhe Nepalin.

Të dy pacientët e infektuar janë punonjës shëndetësorë nga ky rajon dhe ndodhen të shtruar në kujdes intensiv.
Qeveria indiane bëri të ditur se 196 persona që kanë pasur kontakt me rastet e konfirmuara janë të gjithë asimptomatikë dhe kanë rezultuar negativë në testet për virusin.

Ministria e Shëndetësisë deklaroi se të dhënat e disponueshme sugjerojnë se nuk ka nevojë që publiku i gjerë të shqetësohet për sigurinë e individëve dhe familjarëve të tyre. Megjithatë, duke pasur parasysh potencialin e lartë të vdekshmërisë së virusit, deri në 75 përqind, dhe mungesën e një trajtimi apo vaksine specifike, çdo shpërthim monitorohet nga afër.

Çfarë është virusi Nipah?
Virusi Nipah është sëmundje që mund të transmetohet nga kafshët, përmes ushqimit të kontaminuar ose nga kontakti me një person të infektuar.

Ai gjendet kryesisht te lakuriqët e natës në rajonet bregdetare dhe në disa ishuj të Oqeanit Indian, në Indi, Azinë Juglindore dhe Oqeani.
Virusi Nipah ka potencial të konsiderueshëm epidemik apo pandemik, pasi mund të transmetohet përmes kafshëve shtëpiake dhe janë të mundshme edhe transmetimet dytësore nga njeriu te njeriu.

Te personat e infektuar, ai shkakton një gamë sëmundjesh, nga raste pa simptoma deri te sëmundje akute të rrugëve të frymëmarrjes dhe encefalit fatal.
Shkalla e vdekshmërisë varion nga 40 deri në 75 përqind, në varësi të llojit të virusit.

Vendet fqinje me masa kujdesi
Disa nga vendet fqinje të Indisë po zbatojnë kontrolle për udhëtarët që vijnë nga rajoni i prekur dhe po lëshojnë alarme zyrtare.

Tajlanda ka vendosur kontrolle në aeroporte për personat që udhëtojnë nga Bengala Perëndimore. Deri më tani, nuk janë zbuluar raste jashtë Indisë.
Vendi gjithashtu këshillon mbikëqyrje të veçantë për vizitorët në zonat e lidhura me lakuriqët e natës.

Edhe Nepali ka zbatuar masa të reja në përgjigje të rasteve në Indi, duke rritur mbikëqyrjen në kufirin me vendin dhe në aeroportet e tij.

Shpërthimet e Nipah në vitin 2025
Nuk është e pazakontë që shpërthime të virusit Nipah të ndodhin në zonat me rrezik më të lartë.

Sipas Organizatës Botërore të Shëndetësisë, që nga viti 1998, shpërthime janë raportuar në Bangladesh, Indi, Malajzi, Filipine dhe Singapor.
Në korrik 2025, India konfirmoi katër raste, përfshirë dy vdekje, në dy rrethe të Kerala, në jugperëndim të vendit, rajon me shpërthime të rregullta që nga viti 2018.

Bangladeshi gjithashtu raportoi katër raste të virusit midis janarit dhe gushtit 2025. Sëmundja është endemike në këtë vend dhe që nga shpërthimi i parë i njohur në vitin 2001, infeksione te njerëzit janë zbuluar pothuajse çdo vit.

Në të dyja rastet, OBSH vlerësoi se rreziku i përhapjes ndërkombëtare të sëmundjes është i ulët.
Megjithatë, agjencia ndërkombëtare thekson nevojën për rritjen e ndërgjegjësimit për faktorët e rrezikut, pasi aktualisht nuk ekzistojnë barna apo vaksina specifike për sëmundjen e shkaktuar nga virusi Nipah.

/portalb