Çfar bëjnë të BDIs në protestën e studentëve ato që mbi 20 vite ishinnë pushtet? Shkruan Driton Emini

Protesta e studentëve shqiptarë në Maqedoninë e Veriut për mbrojtjen e gjuhës shqipe është një thirrje e pastër për dinjitet dhe barazi. Është zëri i një brezi që nuk pranon më të heshtë përballë padrejtësive dhe përpjekjeve për ta zbehur identitetin kombëtar.

Por ironia më e madhe është pjesëmarrja e BDI-së në këtë protestë. Një parti që për më shumë se 20 vite ishte në pushtet dhe kishte të gjitha mundësitë institucionale për ta mbrojtur dhe avancuar përdorimin e gjuhës shqipe. Çfarë bënë? U rehatuan në kolltukët e pushtetit, u pasuruan me tenderë dhe privilegje, ndërsa kauzat kombëtare i përdorën vetëm si slogan elektoral. Sot dalin në protesta për problemet që vetë i lanë të pazgjidhura. Kjo është hipokrizi politike në formën më të pastër.

Nga ana tjetër, VLEN po dëshmon një paaftësi dhe nënshtrim shqetësues. Edhe pse është pjesë e qeverisë me VMRO-DPMNE, nuk dëgjohet asnjë zë i fortë në mbrojtje të gjuhës shqipe. Heshtja e tyre tregon se pushteti po vlen më shumë se parimet. Kur qëndrimi në qeveri bëhet më i rëndësishëm se mbrojtja e të drejtave kombëtare, atëherë qytetarët mbeten të tradhtuar edhe nga ata që premtuan ndryshim.

Shqiptarët nuk kanë nevojë për parti që protestojnë për dështimet e veta, as për parti që heshtin për të ruajtur postet. Kanë nevojë për përfaqësues me dinjitet, guxim dhe integritet. Studentët sot po japin një mësim të madh: gjuha shqipe nuk është monedhë për pazare politike. Ajo është identitet, histori dhe e drejtë e panegociueshme.

Koha ka ardhur për një reflektim të thellë kombëtar. Është momenti që i gjithë faktori politik shqiptar, elita intelektuale, profesorët universitarë, akademikët dhe të gjithë njerëzit me përgjegjësi shoqërore të ulen së bashku në një tryezë të përbashkët. Pa dallime partiake dhe pa interesa personale, duhet të hapet një debat serioz për kahjen, drejtimin dhe të ardhmen e shqiptarëve në Maqedoninë e Veriut. Çështjet kombëtare nuk mund të lihen më në duart e improvizimit politik dhe kalkulimeve për pushtet. Vetëm përmes unitetit, mendimit të pavarur dhe një platforme të qartë kombëtare mund të ndërtohet një strategji që garanton dinjitetin, të drejtat dhe perspektivën e shqiptarëve në këtë shtet.

Sepse vetëm një popull i vetëdijshëm mund të mbrojë atë që partitë e kanë shitur për interesa personale.

/ms