Çdo “nahi” me parti – nga PPD-ja e deri sot!
Në Maqedoninë e Veriut, shqiptarët vazhdojnë të krijojnë parti të reja, me mbi 20 subjekte politike në tre dekadat e fundit. Fillimisht, shqiptarët përfaqësoheshin nga PPD e Nevzat Halilit, nga e cila dolën PPDSH dhe më vonë PDSH me Arbën Xhaferin, ndërsa funksiononte edhe PDP e Iljaz Halimit.
Gjatë viteve ’90 u formuan edhe parti të tjera si PDK, Partia Liberal-Demokrate Shqiptare, Partia Republikane e Unitetit Popullor, Alternativa Demokratike, dhe Partia për Bashkimin Demokratik Shqiptar, si dhe struktura politike jo të legalizuara që influencuan elektoratin shqiptar.
Pas vitit 2001, BDI u bë boshti kryesor, duke thithur figura politike nga parti të tjera, ndërsa PDSH dhe PPD vazhduan të përballeshin me përçarje dhe formimin e fraksioneve si DR, RDK, BDSH dhe LR-PDSH (Aleanca për Shqiptarët). Para zgjedhjeve të 2015 u krijuan Lëvizja BESA dhe Uniteti, nga të cilat lindën Alternativa dhe PDE.
Fragmentimi vazhdoi: BDI krijoi LD, ASH u nda në dy krahë, Alternativa dhe BESA formuan parti të reja, duke sjellë dy koalicione kryesore: VLEN dhe Fronti Evropian. Pas çarjes së VLEN-it, u formua Aleanca Kombëtare për Integrim për zgjedhjet lokale.
Sot, skena politike shqiptare mbetet e polarizuar, ndërsa krijimi i partive të reja vazhdon, duke treguar se fragmentimi politik nuk ka mbaruar.
Shkruan: Naser Pajaziti
/lajmpress
