Çdo i pesti qytetar në Maqedoni është i varfër !

Të dhënat e Entit Shtetëror të Statistikave tregojnë se  shkalla e varfërisë në Maqedoninë e Veriut është 21,9 për qind. Kjo do të thotë se më shumë se një e pesta e popullsisë jeton me të ardhura që janë nën pragun e përcaktuar të varfërisë, i cili është 60 për qind e të ardhurës mesatare ekuivalente në vend.

Sipas llogaritjeve zyrtare, pragu i varfërisë për një familje me një anëtar është përcaktuar në 178.286 denarë në vit. Për një familje me katër anëtarë, e përbërë nga dy të rritur dhe dy fëmijë nën moshën 14 vjeç, ky prag është 374.400 denarë në vit. Statistikat tregojnë se nëse përjashtohen transfertat sociale dhe pensionet nga të ardhurat e qytetarëve, shkalla e varfërisë në vend do të rritej në 39,4 për qind.

Më kritike është gjendja te familjet me shumë anëtarë dhe te prindërit e vetëm. Te familjet me dy të rritur dhe tre ose më shumë fëmijë, shkalla e varfërisë arrin në 54,8 për qind, që do të thotë se çdo familje e dytë e këtij lloji përballet me probleme ekzistenciale. E ngjashme është gjendja edhe te prindërit e vetëm, ku përqindja e të varfërve është 45,8.

Analiza sipas aktivitetit ekonomik tregon se personat e papunë janë në rrezikun më të lartë, me një shkallë prej 45,7 për qind. Te personat e punësuar kjo shkallë është dukshëm më e ulët, 7,9 për qind, ndërsa te pensionistët varfëria është e pranishme te 12 për qind e kësaj kategorie qytetarësh.

Sipas moshës, fëmijët dhe të rinjtë deri në 17 vjeç janë më të rrezikuarit, me një shkallë varfërie prej 29,5 për qind. Te popullsia mbi 65 vjeç, kjo përqindje është 20,1.

/SHENJA/