Botën e presin temperatura të larta, thatësira, zjarre dhe përmbytje shkatërruese !

El Ninjo po vazhdon të forcohet dhe mund të shndërrohet në një nga fenomenet më të fuqishme të këtij lloji të regjistruara ndonjëherë, ndërsa meteorologët paralajmërojnë se pasojat mund të ndihen në mbarë botën deri thellë në vitin 2027.

Bëhet fjalë për temperatura ekstreme, thatësira, zjarre dhe përmbytje shkatërruese, ndërsa viti i ardhshëm mund të jetë më i nxehti i regjistruar ndonjëherë. Organizata Botërore Meteorologjike (WMO) ka paralajmëruar se El Ninjo tashmë është vendosur fuqishëm dhe do të forcohet edhe më tej gjatë muajve të ardhshëm.

Sipas parashikimeve më të fundit të WMO-së, ekziston pothuajse 100% mundësi që El Ninjo të zgjasë të paktën deri në shkurt 2027, ndërsa kulmi i tij pritet në fund të këtij viti.

Ujërat jashtëzakonisht të ngrohta të Paqësorit tropikal po e fuqizojnë më tej këtë fenomen klimatik, i cili mund të ndryshojë ndjeshëm shpërndarjen e reshjeve dhe temperaturave në të gjithë planetin, duke rritur rrezikun për përmbytje, thatësira dhe temperatura ekstreme.

A po vjen El Ninjo më i fuqishëm i 1.000 viteve të fundit?
“Guardian” raporton se analizat e koraleve, unazave të pemëve dhe dokumenteve historike sugjerojnë se El Ninjo aktual mund të arrijë një intensitet të paparë të paktën gjatë një mijëvjeçari.

Nëse këto parashikime realizohen, fenomeni mund të “grumbullojë” edhe më shumë nxehtësi në atmosferë, e cila tashmë po ngrohet për shkak të ndryshimeve klimatike.
Pikërisht për shkak të kombinimit të një El Ninjo të fuqishëm me ngrohjen afatgjatë globale, ekspertët paralajmërojnë se viti 2027 mund të bëhet viti më i nxehtë i regjistruar ndonjëherë.

Shenjat e para të forcimit të El Ninjos tashmë po regjistrohen në pjesë të ndryshme të botës.
Në Indonezi, rreziku i zjarreve pyjore po rritet, ndërsa në Indi është vërejtur dobësim i reshjeve të përgjithshme të musoneve, por njëkohësisht edhe shfaqje e reshjeve intensive lokale dhe përmbytjeve të menjëhershme. Meteorologët paralajmërojnë se pasojat mund të bëhen edhe më të theksuara gjatë muajve të ardhshëm.

Çfarë është El Ninjo?
El Ninjo është një fenomen klimatik natyror që karakterizohet nga ngrohja e pazakontë e ujërave sipërfaqësore të Paqësorit tropikal qendror dhe lindor. Ai shfaqet në intervale të parregullta, afërsisht çdo dy deri në shtatë vjet, dhe mund të zgjasë për disa muaj.

Edhe pse ndodh mijëra kilometra larg Evropës, ndryshimet në temperaturën e oqeanit ndikojnë në qarkullimin atmosferik në të gjithë botën. Për këtë arsye, El Ninjo mund të ndryshojë sasinë e reshjeve, temperaturat dhe shpeshtësinë e ngjarjeve ekstreme të motit në disa kontinente.

Këtë herë, meteorologët janë veçanërisht të shqetësuar sepse po zhvillohet një El Ninjo jashtëzakonisht i fuqishëm në një botë që tashmë është dukshëm më e ngrohtë se gjatë cikleve të mëdha të mëparshme.

Prandaj, viti 2027 mund të sjellë një seri të re rekordesh temperaturash dhe ngjarjesh ekstreme të motit në mbarë planetin.

/ts