Bleu një banesë në Gjermani, por u pendua ?

Blerja e një banese në Gjermani shpesh konsiderohet si një investim i sigurt dhe një mënyrë për të shmangur pagesën e qirasë, por realiteti mund të jetë shumë më ndryshe. Një emigrant nga Ballkani në rrjetet sociale ndau historinë e tij se sa kushton në të vërtetë të jesh pronar i një banese, përcjell INA, duke cituar mediat kroate.

Ai thotë se para tetë vitesh bleu një banesë në Gjermani me kredi 20-vjeçare, i bindur se më në fund do të jetonte “në të tijën” dhe do të çlirohej nga qiraja. Por, siç pranon sot, shpenzimet e vërteta filluan pikërisht pas kësaj.
Sipas përllogaritjes së tij, shpenzimet mujore për banesën janë shumë më të larta sesa kishte pritur. Vetëm për shpenzimet bazë komunale paguan rreth 500 deri në 550 euro në muaj.

– Për ngrohje paguaj 150 euro në muaj, energji elektrike 80 euro, ujë dhe kanalizim 50 euro, gaz 70 euro, sigurimin e banesës 30 euro, tatimin mbi pronën 40 euro, ndërsa për ashensorin dhe pastrimin e korridorit rreth 50 euro. Përveç kësaj, gjithmonë ka riparime dhe defekte të vogla që kushtojnë të paktën edhe 50 euro në muaj – shpjegon ai.

Përveç shpenzimeve të rregullta, banorët e ndërtesës duhet të marrin pjesë edhe në investime më të mëdha. Deri në fund të gushtit, siç thotë ai, do të duhet të paguajë 18.000 euro për fasadën e re të ndërtesës, gjë që e rëndon edhe më shumë buxhetin e tij.
Sipas përllogaritjes së tij, edhe kur ta shlyejë kredinë, shpenzimet mujore për mirëmbajtjen e banesës do të mbeten rreth 550 deri në 600 euro, që nuk është shumë më pak se qiraja për një banesë në Gjermani, e cila arrin 800 deri në 900 euro me shpenzime të përfshira.

Një problem shtesë, sipas tij, janë edhe marrëdhëniet me fqinjët.
– Kam problem me fqinjin nga banesa mbi mua, i cili bën vazhdimisht zhurmë dhe nuk kujdeset për askënd. Kur je pronar, të gjitha problemet bien mbi ty – riparimet, ankesat, bisedat – thotë ai.

Për këtë arsye, ai paralajmëron se blerja e një banese nuk do të thotë fund i shqetësimeve financiare, por shpesh sjell detyrime afatgjata dhe stres.
– Njerëzit mendojnë se kur blen një banesë e ke zgjidhur jetën. Por realiteti është se çdo muaj mezi merr frymë nga shpenzimet. Prandaj, nëse planifikoni të blini banesë në Gjermani, kontrolloni të gjitha detajet dhe shpenzimet reale – këshillon ai.

/(INA)