Bitcoin bie në nivelin më të ulët ?

Çmimi i Bitcoin ka rënë në nivelin më të ulët që nga tronditja e tarifave të vitit të kaluar, duke vënë në pikëpyetje reputacionin si “ari dixhital”.
Të shtunën, Bitcoin zbriti në 77 mijë e 20 dollarë, me një rënie mbi 8%, ndërsa që nga fillimi i këtij viti ka humbur gati 13% të vlerës.

Rënia vjen në një moment kur ari dhe metalet e tjera të çmuara kanë shënuar rritje të forta, pasi investitorët kërkojnë siguri përballë tensioneve gjeopolitike dhe kërcënimeve për tarifa tregtare.
Ari arriti rekorde historike ditët e fundit, duke u rritur me 23% dhe duke u tregtuar mbi 5 mijë e 600 dollarë për ons, megjithëse të premten pati një rënie të fortë në rreth 4 mijë e 800 dollarë.

Përkrahësit e kriptomonedhave e kanë promovuar prej vitesh Bitcoin si “arin dixhital”, duke pretenduar se është një aset i sigurt në kohë pasigurie. Por Ilan Solot, strateg i lartë i tregjeve globale në Marex Solutions, tha se Bitcoin është “një aset në kërkim të një modeli vlerësimi”, duke shtuar se “nuk ka konsensus të qartë” mbi faktorët që përcaktojnë çmimin e tij.

Ndërkohë, Pramol Dhawan, drejtor menaxhues në Pimco, deklaroi se narrativa e Bitcoin si ar dixhital “është zhdukur”, ndërsa rënia e çmimit tregon se ai “nuk është një revolucion monetar”.
Bitcoin kishte arritur nivele rekord, pranë 125 mijë dollarëve, në fund të vitit të kaluar, pasi investitorët përshëndetën politikat miqësore ndaj kriptomonedhave të presidentit amerikan, Donald Trump, përfshirë emërimin e rregullatorëve të favorshëm, ndalimin e disa veprimeve ndëshkuese ndaj kompanive të kriptos dhe miratimin e rregullave për stablecoin-et.

Që atëherë, çmimi i Bitcoin ka rënë ndjeshëm. Edhe kriptomonedha të tjera si Ethereum dhe Solana kanë humbur vlerë të konsiderueshme krahasuar me majat e vitit të kaluar.
Kërcënimet për tarifa nga Trump, kërkesat për të marrë Groenlandën dhe tensionet gjeopolitike me Iranin dhe Venezuelën kanë shtyrë investitorët drejt arit dhe argjendit, ndërsa kriptomonedhat po trajtohen gjithnjë e më shumë si asete me rrezik të lartë.

“Bitcoin po lidhet gjithnjë e më shumë me administratën”, tha një investitor i kriptos, duke shtuar se po “paguan çmimin e lidhjes me Partinë Republikane”.
Sipas analistëve të kompanisë kërkimore Kaiko, “korrelacioni i Bitcoin me arin është thelbësisht i paqëndrueshëm”, duke kaluar nga lidhje pozitive në negative në varësi të narrativës makroekonomike. “Luhatjet e shkaktuara nga tarifat nxorën në pah krizën e identitetit të Bitcoin”, theksojnë ata.

Solot shton se përdoruesit e hershëm të Bitcoin besonin fort në idenë e arit dixhital, por me hyrjen masive të investitorëve institucionalë, kjo qasje filozofike nuk është më dominuese. “Ishte një këndvështrim i vjetër që u vu në provë dhe nuk funksionoi”, tha ai.

Sipas tij, tregtarët e vegjël po tregojnë më shumë interes për tregjet e parashikimeve si Polymarket dhe Kalshi, të cilat lejojnë bastet mbi ngjarje të ndryshme globale, nga politika te sporti. Ndërkohë, platforma të reja si Hyperliquid po fitojnë popullaritet, ndërsa për investitorët institucionalë, rritja e produkteve si kontratat e përhershme të kriptos dhe kompanitë e thesarit të aseteve dixhitale po “shpërndan kapitalin dhe vëmendjen” larg Bitcoin-it tradicional.

/faxnews