Biografia e Vëllezërve Dervishi..

Vëllezërit Dervishi, lindën në Kërçovë në vitet e 60-ta, në një mjedis ku këndohej bukur kënga shqipe. Të shtyrë nga i ati, një këngëtar entuziast, vëllezërit Dervishi e filluan rrugëtimin e tyre muzikor shumë herët, në konakët e burrave.

Aty do ta mësojnë këndimin karakteristik, që nuk e gjen në asnjë trevë tjetër. Shkollën fillore dhe arsimin e mesëm i kryen në vendlindje dhe tërë jetën e tyre i qëndruan besnik Kërçovës dhe muzikës së bukur autoktone.

Dhe në këto kohë të tranzicionit, kur të tjerët, të tillë si ta, kanë ditur ta devijojnë rrugën, vëllezërit Dervishi i kanë qëndruar besnik nismës së tyre dhe mund të quhen këngëtarët me identitet të plotë. Përgjatë gati tri dekadave karrierë, njerëzit që i përkrahën më së shumti ishin Sami Mehmeti, producent i shtëpisë diskografike “Beni”, dhe kompozitori Naim Gjoshi.

Albumi i tyre i parë u regjistrua në vitin 1984, në Jugoton, pastaj më 1986 në Jugodisk të Beogradit, ku nuk ishte lehtë të depërtonte një artist shqiptar. Nga vitet 1987-88 janë edituar pesë albume nga produksioni “Beni”.

Dalja e parë në skenë daton në vitin 1979, kur, si maturantë, Aziz Dervishi aktivizohet në shoqërinë “Emin Duraku”. Në atë kohë bëri incizimin e parë në Radio-Prishtinë. Do jetë nisma e Aziz Dervishit, të cilit nga vitet 1984 do t’i bashkohet i vëllai, për të qenë të pandashëm përgjatë tri dekadave.

Incizimi i parë dhe kontakti me Radiotelevizionin e Maqedonisë ndodh pikërisht në vitin 1987. Nga këngët e para, sukses të madh patën Ibe Palikuqi dhe Luta fukara. Me shembjen e kufijve me Shqipërinë, vëllezërve iu krijua hapësirë e re bashkëpunimi, përmes së cilës rezultojnë të suksesshme veçanërisht këngët e punuara me kompozitorin Naim Gjoshi. Mbahet mend prezantimi në shumë festivale, posaçërisht në spektaklin “12 në Hollivud”.

Në prononcimin e tyre për emisionin “Gjurmë në pentagram” theksojnë: Kërçovarët këndojnë si të gjithë, por jo të gjithë mund të këndojnë si kërçovarët. Me këtë duam të themi se nuk jemi ne këngëtarë shumë të mirë, por muzika kërçovare është tejet e veçantë dhe e pakopjueshme. Repertori i tyre, në përqindjen më të madhe, përbëhet nga këngë të vjetra dhe të stilizuara, si : Vjen valia prej Manastiri, Sulqe Begu, Moj e majr, Shtatë bilbilat, Në bahçe na ka ra bryma, Lum e lum, Vaj zamoni, Motra me shtatë vëllezër, kurse ndër këngët e reja, veçohen: Emrin tënd në zemër mbaj dhe Vajza juaj. Ky kontribut njihet nga qytetarët e Kërçovës, të cilët në çdo moment shprehin admirim dhe i konsiderojnë ambasadorë të këngës kërçovare.

Sipas koreografit Dilaver Kryeziut, ata janë dy këngëtarë me zë bilbili, të cilët ndër vite nuk janë transformuar. Në muzikën e tyre, bashkëveprojnë të tri komponentët, struktura, trajta dhe motivi, andaj mbeten provokim i vazhdueshëm për shumë koreografë.
Kompozitori Naim Goshi, shprehet: Askush më mirë se ata nuk ka ecur në traditën e këngës së bukur kërçovare.

Kjo ka të bëjë me talentin dhe genin e tyre, meqë rrjedhin nga një familje këngëtarësh. Nëse një ditë do të ngrihej një përmendore për këngën kërçovare në Kërçovë, mendoj se ajo nuk do të kishte vlera pa ta . Ndërsa, tenori Katriot Tusha vëren: Zërat e tyre të mrekullueshëm dhe melosi në repertorin e tyre është për t’u pasur zili nga çdo këngëtar profesionist.

Ata shprehin identitetin e kombit tonë me muzikën specifike si ndërtim struktural, qoftë në nota, si shtrirje dhe si harmoni vokale, e cila nuk është e rastësishme, por ka ardhur së bashku me kohën dhe konsiderohet thesar i kombit tonë. Treva e Kërçovës është e veçantë si polifonia labe, ritmi i Tropojës, melosi i Beratit, Shqipërisë së Mesme, pentatoni i Jugut, kurse këta dy interpretë kanë timbër specifik me shumë frekuenca, që harmonizohet shumë mirë falë talentit dhe eksperiencës së tyre.

/Valmir Aziri