Bie çmimi i naftës, pas vendimit të Trump ?

Vendimi i presidentit të SHBA-së, Donald Trump, për të pezulluar operacionin “Liria” është pritur pozitivisht nga tregjet globale, duke reflektuar optimizëm për një përparim të mundshëm në negociatat e paqes me Iranin.

Si pasojë e këtij zhvillimi, çmimi i naftës Brent ka pësuar rënie të ndjeshme, duke zbritur nën nivelin e 108 dollarëve për fuçi, nga 113 dollarë që ishte në të njëjtën kohë një ditë më parë.

“Liria”, një iniciativë dyditore e Shteteve të Bashkuara për të shoqëruar anijet tregtare në ngushticën strategjike të Hormuzit, kishte tensionuar marrëdhëniet me Iranin, duke rrezikuar edhe stabilitetin e armëpushimit të brishtë mes palëve.

Presidenti Trump deklaroi se pezullimi i operacionit synon t’i hapë rrugë përfundimit të bisedimeve për paqe, një sinjal që pritet të ndikojë pozitivisht edhe në tregjet evropiane, duke ndjekur tendencën e lehtë të rritjes të vërejtur në Azi.

Megjithatë, analistët paralajmërojnë se çdo shenjë ngecjeje në negociatat SHBA-Iran mund të perceptohet si një tjetër dështim i përkohshëm, duke rritur rrezikun e rikthimit të përplasjeve ushtarake në Lindjen e Mesme dhe të ndërprerjeve të zgjatura në rrjedhat jetike të energjisë përmes ngushticës së Hormuzit.

/ms