Kërçovari Besnik Limani: Në ring dal me flamur shqiptar dhe këngë shqipe

E lexon historinë e shqiptarëve, ndërsa në ring del gjithmonë me këngë shqipe dhe me flamur shqiptar. E quajnë Besnik Limani, por nuk është familje me të mirënjohurin Mirdi Limani, megjithatë inspirimin ka marrë nga ai.

Limani, i cili është i lindur në Wienë të Austrisë, është me origjinë nga Zajazi i Kërçovës, në një bisedë për “Lajm” rrëfen për fillimin e karrierës, sukseset dhe planet e tij në të ardhmen në sportin e Thaiboxit.

“Me Thaibox kam filluar të merrem qysh në moshën 15 vjeçare. Luftoj në stilin K-1. Jam kampion interkontinental në WKF deri 72,5kg dhe kampion evropian në WUFC deri më 71kg në garat profesionale.

Deri tani kam zhvilluar rreth 36 luftëra, prej tyre 27 fitore, 2 barazime dhe 5 humbje, të gjitha këto në meçet amatore dhe profesionale. Meçin e fundit e pata më 25 maj në Aarau të Zvicrës ku fitova titullin e Evropës”, e nis bisedën Limani, anëtar i klubit Team Dimos nga Austria.

Ai tregon se si motivohet para çdo ndeshje.
“Kënga shqipe dhe flamuri kombëtar janë ato që më motivojnë më shumë gjatë momentit kur ngjitem në ring. Gjithashtu edhe publiku që më mbështetë shumë. Pastaj e kam më lehtë, ndërsa kundërshtari më zor”.

Limani thotë se idhull i tij është Mirdi Limani, me të cilin e lidh vetëm mbiemri.
“Po, është e vërtetë se është idhull im. Nuk jemi familje, por veç mbiemrin e kemi njësoj. Ai është legjendë e gjallë, ka qenë shumë i suksesshëm, përveç asaj është edhe një patriot i madh shqiptar. Ai është inspiruesi im më i madh”.

Për fund, Limani shpalos planet e tij për të ardhmen.
“Në muajin tetor do të boksoj sërish, ndoshta për titullin e botës, por akoma nuk është caktuar asgjë. Planet e mia janë të bëhem kampion bote në të gjitha versionet”, ka përfunduar Limani, të cilin e stërvitin dyshja e trajnerëve Dietmar Molzer nga Austria dhe Isaak Kosashvili. 

/ms