BDI përjashtoi diasporën shqiptare me grafën “joreizednt” pasojat edhe tani në numrin e këshilltarëve!

Regjistrimi i popullsisë i vitit 2021 duhej të ishte një proces i transparencës dhe krenarisë për shqiptarët në Maqedoninë e Veriut. Në vend të kësaj ai proces u shndërrua në një instrument politik që goditi më shumë se kushdo tjetër diasporën shqiptare shtyllën që për dekada ka mbajtur gjallë familjet, ekonominë dhe aspiratat tona kombëtare. Në zemër të këtij procesi qëndron një vendim fatal futja e grafës për “banorë jorezidentë” të gjithë qytetarët që jetojnë jashtë vendit, shkruan Zhurnal.

Diaspora shqiptare u godit në regjistrimin e vitit 2021 –
Ky detaj teknik që mund të dukej i parëndësishëm për publikun e gjerë ka pasur pasoja shkatërrimtare të cilat po vërehen edhe sot e kësaj dite. Përmes asaj metode manipuluese qindra mijëra shqiptarë të diasporës u futën në një kategori të veçantë jo si pjesë e numrit të përgjithshëm të popullsisë, por si “shtesë jashtë vendit”. Rezultati i menjëhershëm numri i shqiptarëve në Maqedoni u zvogëlua artificialisht dhe përfaqësimi i tyre politik e institucional u nënvlerësua.

Se kush është fajtor për këtë, VLEN, thonë se përgjegjësia ka emra konkretë si Ali Ahmeti, Bujar Osmani, Artan Grubi, Blerim Bexheti, Ilmi Selami dhe të gjithë përfaqësuesit e BDI-së në atë qeveri. Ata ishin ata që shkruan, propozuan dhe votuan Ligjin e Regjistrimit, duke lejuar futjen e kësaj grafë fatale. Nuk bëhet fjalë për një vendim teknik të një agjencie statistikore, por për një vendim politik i marrë në Parlament me votat e BDI-së.

Pasojat u panë menjëherë, fshatra të tëra shqiptare në Maqedoninë perëndimore dolën me vetëm 30–50% të popullsisë së tyre të regjistruar. Në letër, këto vendbanime dukeshin të zbrazura ndërkohë që në realitet ishin të lidhura ngushtë me diasporën. Ky hendek mes realitetit dhe statistikës nuk është thjesht një gabim numerik por një zvogëlim i qëllimshëm i peshës politike të shqiptarëve.

Heshtja e qëllimshme e BDI-së –
Në atë periudhë askush nga eksponentët e BDI-së nuk e ngriti zërin. Nuk pati reagime për ofendimin e përjashtimin e diasporës. Ndërkohë që numrat e shqiptarëve zvogëloheshin në letër, ministrat e BDI-së sipas akuzave të VLEN ishin të fokusuar në tenderë, kompani private dhe interesa familjare. Pra, ndërsa diaspora humbte përfaqësimin elita e partisë fitonte privilegje dhe pasuri.

Sot, BDI mundohet të flasë për respekt ndaj diasporës. Por a mund të ketë besim diaspora tek ata që e përjashtuan në mënyrë sistematike? Si mund të jetë BDI zgjidhje, kur është vetë krijuesi i problemit? Ky është thelbi i akuzës së VLEN-it nuk mund të pretendosh drejtësi për diasporën kur vetë ke firmosur grafën që i mohoi asaj të drejtën themelore të jetë pjesë e popullsisë aktive të vendit të vet.

Kujtojmë që, ajo grafë e turpit dëshmon sesi diaspora shqiptare u kthye nga një krenari kombëtare në një numër të fshirë nga statistikat zyrtare. Përgjegjësia është e qartë dhe e emërtuar BDI e shkroi, e propozoi dhe e votoi këtë model. Nëse shqiptarët duan ta rikthejnë diasporën në vendin që meriton si pjesë organike e kombit dhe si faktor politik i barabartë atëherë duhet të mësojnë nga kjo përvojë mos i besoni më atyre që njëherë e bënë diasporën “jorezidente”. Sepse ajo grafë nuk ishte thjesht një kolonë statistike ajo ishte një projekt i tërë për ta reduktuar peshën e shqiptarëve në këtë shtet.

/Zhurnal.mk