Autostradës Kërçovë-Ohër nuk i shihet fundi, qytetarët shprehen të revoltuar ?

Është gjithnjë e më e sigurt se do të ketë shtyrje të afatit për përfundimin e autostradës Kërçovë-Ohër, edhe për disa muaj, megjithëse pushteti premtoi se ajo do të jetë tërësisht e gatshme deri në fund të vitit 2026. Ministri i Transportit, Aleksandar Nikolloski thotë se edhe kushtet atmosferike gjatë periudhës së kaluar nuk kanë qenë të favorshme.

“Nuk mund t’i parashikoj kushtet atmosferike. Kjo vjeshtë ishte me shi. A do ta përfundojmë në dhjetor apo në mars, ky është diapazoni për shkak të kushteve atmosferike, është çështje e Zotit dhe e kohës. Por premtimin që e dhamë, do ta realizojmë”, deklaroi Aleksandar Nikolloski – Ministër i Transportit.

Edhe qytetarët nuk janë shumë optimistë se do të mund të udhëtojnë në autostradë deri në fund të vitit.
“Shpresa ekziston gjithmonë, por kjo që thuhet nuk është reale. Sa para harxhuan për atë rrugë. 11 vite e bëjnë dhe ende nuk është bërë. Sa kredi morën nga kinezët, a do të marrin ende kredi nuk e kuptoj”, tha një qytetar.

“U premtua se në vitin 2019 do të ishte gati. Asgjë nga ajo. Unë udhëtoja çdo ditë në të njëjtën rrugë, është tmerr. Uroj të ndodhë diçka të bëhet, edhe nëse bëhet, nuk do të duket si autostradë sipas rregullave evropiane”, u shpreh një tjetër qytetar.

“Ajo që e paralajmëroi ministri se ka gjasa të shtyhet deri në marsin e vitit të ardhshëm, unë mendoj se do të shtyhet edhe për 3 muaj, sepse kur të ngecin në pjesën te fshati Botun. Aty ka gjëra të paeksploruara”, theksoi një qytetar tjetër.

“Duket se po punohet në rrugë, të shpresojmë se do ta mbajnë fjalën. Mendoj se do ta përfundojnë”, deklaroi një qytetar.
Gjatë viteve të kaluara realizimin e këtij projekti e kanë ndjekur shumë probleme. Janë shfaqur edhe 13 rrëshqitje të reja të dheut. Kërçovë-Ohër, i cili po ndërtohet tashmë 12 vite dhe fillimisht duhej të lëshohej në përdorim në qershor të vitit 2018, është i gjatë 57 kilometra dhe ndërtimi deri më tani kushton pothuajse 600 milionë euro. Pjesë të autostradës janë lëshuar në përdorim sapo kanë qenë të gatshme.

/Alsat.mk