Autostrada Kërçovë-Ohër hyn në fazën finale !

Mes maleve, betonit dhe makinerive të rënda, puna në autostradën Kërçovë–Ohër vazhdon me ritëm të përshpejtuar. Pamjet nga ajri tregojnë kantierin ku një nga projektet më të gjata infrastrukturore në vend po hyn në një fazë të re të ndërtimit.

Në segmentin mes Presjekës dhe Kërçovës, dy galeri tashmë kanë përfunduar, ndërsa, sipas autoriteteve, në të tretën po punohet intensivisht. Krahas tyre, ekipet ndërtimore po vazhdojnë stabilizimin e terrenit, përfundimin e urave dhe punimet në të dy tubat e tuneleve.

Gjatë inspektimit të punimeve, zëvendëskryeministri dhe ministri i Transportit, Aleksandar Nikolloski, deklaroi se brenda muajve të ardhshëm pritet të hapen edhe 10 kilometra të rinj të autostradës.

“Shifrat janë vërtet mbresëlënëse. Vetëm këto tri galeri që ndodhen pas meje kanë një gjatësi prej 1 kilometër e 100 metra, ndërsa tunelet do të jenë më të gjatat në Maqedoni, njëri tub me gjatësi prej 2 kilometrash, tjetri tub me gjatësi prej 2 kilometrash e 100 metrash, siç thashë, tunelet më të gjata në Maqedoni, ndërsa galeritë për herë të parë të këtij lloji po ndërtohen jo vetëm në Maqedoni, por në të gjithë rajonin”, u shpreh Aleksandar Nikolloski, zëvendëskryeministër dhe ministër i Transportit.

Sipas autoriteteve, galeritë janë zgjedhur si zgjidhja kryesore për stabilizimin e terrenit në këtë pjesë të trasesë, e cila konsiderohet ndër më sfidueset për ndërtim. Në të njëjtën kohë po vazhdojnë punimet edhe në tunelet, që pas përfundimit do të jenë më të gjatat në vend.

“Për ta mbrojtur trasenë dhe për të pasur një qarkullim të sigurt, këto mrekulli inxhinierike që ndodhen pas nesh ishin zgjidhja më e mirë. Ky ishte një projekt i braktisur, një projekt në të cilin askush nuk besonte, por ja ku është, tashmë po shihet fundi i tij. Tashmë kemi 34 kilometra në të cilët qarkullohet, ndërsa në muajt e ardhshëm do të hapim edhe 10 kilometra të tjerë, që janë më të ndërlikuarit, 10 kilometra ku përfshihen tunelet dhe galeritë”, tha Aleksandar Nikolloski, zëvendëskryeministër dhe ministër i Transportit.

Autostrada Kërçovë-Ohër, pjesë e Korridorit 8, nisi të ndërtohet në vitin 2014, por projekti u përball me vonesa të shumta për shkak të problemeve teknike, ndryshimeve në projekt, nevojës për punime shtesë për shkak të terrenit të vështirë dhe çështjeve me dokumentacionin, ndërsa përfundimi i plotë i këtij aksi dhe i të gjithë Korridorit 8 është planifikuar deri në vitin 2030.

VIDEO:

/tv21