Autostrada Kërçovë-Ohër askund..! (VIDEO)
“Ndodhemi në autostradën Ohër-Kërçovë, në vendin e quajtur Trebenishtë afër aeroportit të Ohrit. Kjo pjesë e autostradës duhej që në fillim të gushtit të lëshohej në përdorim këtë e paralajmëroi vetë ministri i Transportit dhe Lidhjeve Bllagoja Boçvarski, por siç mund të shihet kjo pjesë edhe pse jemi në muajin shtator nuk është lëshuar në përdorim, jo që nuk është lëshuar në përdorim por në këtë pjese nuk janë duke u zhvilluar as punime intensive siç paralajmëroi ministri aso kohe”, raporton Salije Sadiku, gazetare e TV21.
Sipas të gjitha planifikimeve të Ministrit Boçvarski kjo pjesë e autostradës tanimë prej një muaji duhej që të ishte funksionale.
Pasi kaloi një muaj nga ky premtim ne ju drejtuam Ministrisë së Transportit dhe lidhjeve për të parë se deri ku kanë ngelur punimet dhe pse e njëjta nuk po lëshohet në përdorim. Nga atje gishtin e drejtojnë tek kompania e cila po zhvillon punimet në këtë autostradë.
“Lidhur me pyetjet tuaja, ju njoftojmë se të gjitha procedurat konkretisht në seksionin 5 nga Trebenishta deri në Ohër janë kryer nga Ministria e Transportit dhe Lidhjeve. Mbetet tashmë që kontraktori të kryejë punimet e ndërtimit sipas planit dinamik.
Ndërtimi i autostradës së Kërçovës -Ohër mbetet prioritet dhe Ministria e Transportit dhe Lidhjeve së bashku me Ndërmarrjet Publike janë në koordinim të vazhdueshëm me kontraktuesin dhe mbikëqyrësin për përfundimin dhe ndërtimin sa më të shpejtë të seksionit 5, gjegjësisht të gjithë autostradës”, tha Ministria për Transport dhe Lidhje.
Ndërkaq nga Ndërmarrja Publike “Rrugët Shtetërore” thonë se në këtë pjesë të autostradës po punohet me ritëm intensiv dhe kanë mbetur edhe 2km rrugë për tu asfaltuar.
“Deri në këtë moment është gërryer rreth 95% e gjithë trasesë, ndërsa përqindja e realizimit të punimeve në pjesën Trebenishtë-Podmolje është 75%, pra mbeten për t’u asfaltuar edhe 2 km. Ka pasur arsye të justifikuara që kanë ngadalësuar punën, por me ritmin aktual të rritjes së punës pritet që procesi të përshpejtohet”, thonë nga Ndërmarrja Publike ”Rrugët Shtetërore”.
As Ministria e as Drejtoria në përgjigjet e tyre nuk dhanë detaje se kur kjo pjesë që tanimë duhej të ishte funksionale duhet të lëshohet në përdorim.
VIDEO:
/tv21
