Asnjë lëvizje për transaksionet e dyshimta financiare të Drin Ahmetit..!?

Prokuroria Publike e Maqedonisë së Veriut ende pret ndihmën juridike të SHBA-së për transaksionet e dyshimta financiare të Drin Ahmetit. Nga kjo Prokurori thonë se për rastin akoma mblidhen dokumente, të cilat janë objekt analize dhe se vendimi i prokurorit publik për veprime të mëtejshme është i kushtëzuar pikërisht nga informacionet që duhet të dorëzohen përmes kërkesës për ndihmë juridike ndërkombëtare të Shteteve të Bashkuara, gjë që merr periudhë të gjatë kohore, raporton Portalb.mk.

“Për lëndën për të cilën tregoni interes, institucionet drejt të cilave prokurori i lëndës ka dhënë urdhër, po veprojë në mënyrë aktive, mblidhen dokumente shtesë, e cila është lëndë e analizës dhe po merren veprime të tjera parahetimore, të koordinuara nga ana e Prokurorisë. Lënda është në procedurë parahetimore dhe rrjedha e procedurës varet nga një sërë rrethanash.

Në këtë rast bëhet fjalë për dokumentacion të gjerë që është objekt analize, përveç kësaj, vendimi i prokurorit publik për veprime të mëtejshme është i kushtëzuar nga informacionet që duhet të dorëzohen përmes kërkesës për ndihmë juridike ndërkombëtare të Shteteve të Bashkuara. Ndihma juridike ndërkombëtare është një proces që kërkon një periudhë më të gjatë kohore për veprim të duhur nga autoritetet e atjeshme”, thanë nga Prokuroria për Portalb.mk.

Autoritetet e vendit, kërkesën për ndihmë juridike, e ka dërguar para mbi tre muajve, ndërsa pas së cilës kërkesë nga ana e autoriteteve të Shteteve të Bashkuara të Amerikës u kërkuan dhe menjëherë u janë dorëzuar të dhëna shtesë nga ana e prokurorisë.

Ndërkohë, Drin Ahmeti, në një intervistë për portalin Republika ka thënë se asnjëherë nuk ka dhënë deklaratë në Prokurorinë Publike për rastin me Soravinë edhe pas më shumë se 18 muajsh nga hapja e rastit. Nipi i Ali Ahmetit pohon se asnjë prokuror nuk ia ka kërkuar një gjë të tillë, vetëm se në Prokurori është thirrur për të dhënë deklaratë për një tjetër rast që ka të bëjë me koncesionin e gurores së kompanisë Everest.

Soravia ka të bëjë me një seri transaksionesh të dyshuara financiare që lidhen me Drin Ahmetin dhe partnerin e tij, Nik Nazar Mehmetin, ku përfshihen miliona dollarë dhe euro. Këto transaksione kanë zgjuar dyshime për mundësinë e pastrimit të parave dhe përfshirjes në aktivitete të dyshimta financiare. Hetimet po zhvillohen edhe për çështje të tjera, duke përfshirë gjetjen e materialeve eksplozive në automjetin e Drin Ahmetit gjatë vitit të kaluar.

Në qershor 2023, mediat njoftuan se nipi i Ali Ahmetit, Drini, nëpërmjet kompanisë “Tor Industries”, bashkë me një kompani nga Shqipëria me emrin “Pe-vla-ku SHPK”, janë pronarët e rinj qendrës afariste “Soravia”, e cila ndodhet në Qendrën Tregtare Të Qytetit në Shkup. Drin Ahmeti është edhe bashkëpronar i kompanisë “Everest JD” e cila ka koncesion aktiv për shfrytëzimin e gurit gëlqeror në lokalitetin “Bukoviq” në Zajaz, por që merret edhe me ndërtimin e objekteve të inxhinierisë civile.

Pas shumë akuzave dhe dyshimeve, Drin Ahmeti, në mars të vitit 2024 u njoftua se do të tërhiqet nga kompania “Top” që e bleu “Soravia-n”.
Atëkohë nga Prokuroria për Krim të Organizuar dhe Korrupsion thanë se nuk ka kurrfarë lidhje që është tërhequr, por e rëndësishme është se kush ka qenë person udhëheqës në momentin e kryerjes së veprave penale.

“Lidhur me ndryshimin e strukturës pronëse të subjektit juridik, ju përkujtojmë se në pajtueshmëri të ligjit, nëse ekziston përgjegjësi, barra është e atij personi i cili në momentin e ndodhjes eventuale të veprës penale ka qenë pronar ose ka udhëhequr me subjekt të caktuar juridik, madje prej aty ky ndryshim nuk do të ndikoj ndaj procedurës që zhvillohet”, thanë atëkohë nga PTHP për krim të organizuar.

Sipas numrit dhe nivelit të institucioneve që janë të përfshira në këtë parahetim, duket se bëhet fjalë për një nga rastet më të mëdha të cilët i ka ngritur në kohën më të re, por edhe se nuk bëhet fjalë këtu vetëm për krim ekonomik, por edhe për krim serioz.

Drin Ahmeti publikoi se “Tor Industries” e ndërmerr kompania “Teksas Amerikan International Holldings”, e cila sipas emisionit “Kod” i TV Telmës, është e biznesmenit Nik Nazar Mehmedi, i cili madje ka themeluar kompani me investim prej tre milionë euro dhe është me seli në adresë të njëjtë në Shkup si “Tor Industries”. Firma në të njëjtën adresë me “Thor”-in në biznes qendrën “Soravia” quhet “Amerikan investments” dhe është e regjistruar për shërbime konsultuese.

Drin Ahmeti, nipi i udhëheqësit të BDI-së Ali Ahmeti, djali i vëllait të tij Fekri, vitin 2023 u bë pronar i qendrës së biznesit “Soravia”.
Dyshohet se ai ka fituar tenderë në kurriz të xhaxhait të tij, Ali Ahmeti, mirëpo Drin Ahmeti e ka mohuar lidhjen e liderit të BDI-së me biznesin e tij.

Policia e Maqedonisë së Veriut, nga ana tjetër, në korrik 2024 ngriti kallëzim penal ndaj nipërve të Ali Ahmetit, përkatësisht Drin Ahmetit dhe vëllait të tij, nën dyshimet për përfitime të kundërligjshme gjatë shfrytëzimit të koncesionit në Zajaz.

“Kallëzim penal ndaj 26 vjeçari D.A. dhe 34 vjeçarit B.A. nga Kërçova, për shkak ekzistimit të dyshimeve për kryerjen e veprës penale “keqpërdorimi i pozitës dhe autoritet zyrtar”, e dënueshme në bazë të nenit 353 nga Kodi Penal”, sqaroi Policia.

Ata dyshohet se nga viti 2016 kanë përfituar materialisht në kundërshtim me Ligjin për burime minerale dhe Marrëveshjen për koncesion për shfrytëzimin e një lokaliteti në Zajaz. Kjo marrëveshje ishte nënshkruar ndërmjet subjektit juridik nga Kërçova dhe Qeverisë së Maqedonisë së Veriut, gjegjësisht Ministrisë së Ekonomisë e udhëhequr atëkohë nga Kreshnik Bekteshi.

/portalb