Arrestimi i Grubit: BDI e quan hap pozitiv, VLEN flet për “kutinë e zezë”, LSDM akuzon për marrëveshje, VMRO kundërpërgjigjet ?

Arrestimi ose dorëzimi i ish-zyrtarit të lartë të Bashkimi Demokratik për Integrim, Artan Grubi, pas një periudhe arratie, ka ngjallur reagime dhe supozime në skenën politike. Secila parti e komenton në forma të ndryshme. BDI e sheh si hap pozitiv vendimin për siç thonë ata, t’u kthyer në vend. Koalicioni VLEN nga ana tjetër sugjeron se situata e krijuar mund të ndikojë në të ardhmen politike të partisë së drejtuar nga Ali Ahmeti, duke aluduar në tronditje të mundshme brenda strukturave të saj, transmeton Portalb.mk.

“Kutia e zezë e qeverisjes së BDI-së më në fund është dorëzuar. Artan Grubi është pjesëmarrës dhe ekzekutor i të gjitha marrëveshjeve të errëta të BDI-së. Prandaj, BDI po dridhet nga frika se nuk e dinë se për çfarë është gati të flasë Artan Grubi. Pasi BDI humbi në mënyrë katastrofale në zgjedhjet lokale dhe të gjitha premtimet e rreme të Ahmetit për zgjedhje të parakohshme dhe hyrje të supozuar në qeveri dështuan, Artani nuk ka zgjidhje tjetër veçse të përballet me mëkatet e veta. Por cilin do ta ngreh me vehte, mbetet për t’u parë”, thonë nga VLEN.

Bashkimi Demokratik për Integrim nga ana tjetër, ka reaguar duke thënë se vlerëson pozitivisht vendimin e Artan Grubit për t’u kthyer në vend, “duke krijuar kështu mundësinë që përmes një procedure transparente, të drejtë dhe të paanshme të paraqiten të gjitha argumentet në dispozicion dhe të sqarohen të gjitha çështjet”.

“Presim që procesi të zhvillohet në përputhje me standardet më të larta të sundimit të ligjit: para së gjithash, me një nivel të lartë transparence, në përputhje me interesin publik; por mbi të gjitha, me respektim të plotë të prezumimit të pafajësisë dhe me mbrojtje të të drejtave dhe lirive individuale. BDI mbetet e palëkundur në qëndrimin se drejtësia duhet të jetë e barabartë për të gjithë, pa selektivitet, pa standarde të dyfishta dhe pa ndikime politike. Vetëm një procedurë e drejtë dhe profesionale i shërben së vërtetës, institucioneve dhe besimit të qytetarëve. Duke marrë parasysh interesin e lartë politik dhe publik për këtë rast, partia do ta ndjekë me kujdes procesin në të gjitha fazat e tij”, thonë nga BDI.

Ndërkohë, sipas LSDM-së me kthimin e Grubit, BDI po e shpëton Mickoskin.
“Pas teatrit të sotëm në kufirin maqedonas, tashmë është e qartë për të gjithë se arratisja e Artan Grubit ishte marrëveshje politike. LSDM e njoftoi këtë në dhjetor 2024. Tani është konfirmuar para syve të publikut maqedonas. Ashtu siç ranë dakord ta lironin, tani kanë rënë dakord ta kthejnë. Në këtë mënyrë, VMRO, me mbështetjen e BDI-së, dëshiron të mbulojë skandalin më të madh të drogës me 5 ton drogë që çon në majën e qeverisë së Mickoskit. Por edhe skandalet e shumta me tenderët kriminalë për të cilët nuk ka pasur përgjigje për më shumë se 80 ditë. 161 tendera për kompaninë familjare të Tomovskit, 51 tendera për “Pyramid Building”, 74 tendera për “Lendi Group”, 9 milionë euro për një kompani me dy punonjës, 1.2 milionë euro tendera përmes Postës për një kompani afër ZNAM. Të gjitha tenderët çojnë në rrethin e ngushtë rreth Mickoskit dhe për më shumë se 80 ditë nuk ka pasur asnjë reagim nga prokuroria. Për më shumë se 20 ditë nuk ka pasur përgjigje për 5 ton drogë, asnjë përgjigje për fotografitë me Sime, për Adamoviçin…Pra, janë të përfshira si dogana ashtu edhe policia, dhe institucione të tjera nën kontrollin e strukturës qeverisëse dhe Mickoskit”, thuhet në reagimin e LSDM-së.

Sipas tyre, VMRO-OKG është në bashkëpunim me BDI-në, Qeveria po merr nën kontroll gjyqësorin dhe prokurorinë, “çështjet e Prokurorisë Speciale po shemben, tani është koha e duhur që Grubi të dorëzohet”.
“Kush qesh kur e arrestojnë? Si nuk ka asnjë kamera për 65 mijë për 5 ton drogë dhe ka kamera për Grubin? Kjo nuk do të kalojë. Kushdo që ka shkelur ligjin do të mbajë përgjegjësi”, thonë nga LSDM.
VMRO-ja ndërkohë thotë se “SDS-ja është nervoze dhe e frustruar sepse Artan Grubi u arrestua dhe mund të zbulojë informacione rreth aferave dhe krimeve të Zaevit, Filipçes dhe Spasovskit”.

“E kuptojmë SDS-në, ata janë nervozë dhe të frustruar sepse Artan Grubi u arrestua dhe tani mund të zbulojnë informacione rreth aferave dhe krimeve për të cilat kanë punuar së bashku me Zoran Zaevin, Vice Zaevin, Oliver Spasovskin, Venko Filipçen. Kjo është arsyeja pse SDS-ja po përpiqet të fshehë gjurmët dhe në këtë mënyrë të shpëtojë veten”, thonë nga VMRO.

Ndryshe, në orët e para të mëngjesit të sotëm u arrestua ish-zëvendëskryeministri i Maqedonisë së Veriut, Artan Grubi.
“Sot (23.02.2026) në orën 06:10, në Pikën e Kalimit Kufitar Bllacë, në hyrje të shtetit, u privua nga liria Artan Grubi (48), i cili kërkohej me urdhërarrest ndërkombëtar lidhur me hetimin e veprës sē kryer penale sipas nenit 354, paragrafi 5, në lidhje me nenin 3, në lidhje me nenin 22 të Kodit Penal”, thonë nga MPB.

Nga MPB-ja për TV24 konfirmuan se Grubi është dërguar në burgun e Shutkës, pasi ndaj tij ishte caktuar masë paraburgimi 30-ditor në mungesë, gjatë kohës që ishte në arrati.
Nga Prokuroria Themelore Publike Shkup njoftuan se do të informojnë më tej për mënyrën e vazhdimit të procedurës, përkatësisht kur ai do të paraqitet para prokurorit publik.

Artan Grubi në fund të vitit 2024 u fut në Listën e Zezë Amerikane për korrupsion dhe ndërhyrje në proceset gjyqësore për të shpëtuar Sasho Mijallkovin, pas së cilës ai u tërhoq nga jeta publike.
Pak ditë më vonë, ai u arratis nga vendi, ndërsa kërkohej me fletarrest ndërkombëtar së bashku me ish drejtorin e Lotarisë Shtetërore Përparim Bajramin, për rastin ‘Lotaria’. Atyre u është caktuar masa e paraburgimit për 30 ditë.
Që të dy dyshohen se kanë dëmtuar buxhetin e shtetit në vlerë prej mbi 8.2 milion euro. Ata ngarkohen për veprën penale “mashtrim në shërbim” sipas nenit 354 të Kodit Penal, që parashikon dënim me të paktën katër vjet burg.

/portalb