ALARM PËR ÇMIMET! Lufta në lindjen e mesme, ekspertët paralajmërojnë inflacion të ri

Inflacioni në Maqedoni është në rënie, por lufta në Iran dhe rreziku i bllokimit të ngushticës së Hormuzit mund të rrisin sërish kostot e jetesës. Nëse konflikti në Lindjen e Mesme zgjat, inflacioni mund të tejkalojë parashikimin prej 3.1% të Bankës Popullore. Rritja e çmimit të naftës do të shtrenjtojë karburantin, transportin dhe prodhimin, duke çuar në çmime më të larta për mallra dhe shërbime.

Ekspertët paralajmërojnë për “inflacion të importuar” nga energjia dhe ushqimet. Edhe pse Maqedonia nuk ka lidhje të drejtpërdrejta tregtare me Iranin, çdo rritje globale e çmimeve të naftës ndikon në ekonominë vendase përmes karburanteve, transportit dhe kostove të prodhimit.

Qeveria po shqyrton uljen e akcizave dhe taksave të karburantit nëse çmimi i naftës rritet ndjeshëm. Kryeministri Hristijan Mickoski tha se furnizimet me karburant janë të qëndrueshme dhe situata është nën kontroll, ndërsa institucionet po monitorojnë zhvillimet.

Banka Popullore thekson se për momentin skenarët janë të moderuar, por në rast përshkallëzimi është e gatshme të përdorë instrumente stabilizuese. Ndërkohë, Ministria e Ekonomisë dhe ekspertët paralajmërojnë se një rritje e fortë e çmimit të naftës mund të sjellë një valë të re inflacioni dhe kërkojnë masa për stabilizimin e çmimeve, veçanërisht për produktet bazë.

/koha