Alarm në aeroportin e Frankfurtit! Ja pse ?
Gjashtë punonjës të Aeroportit të Frankfurtit janë infektuar me malarie, ndërsa dy prej tyre kanë humbur jetën si pasojë e sëmundjes së rrezikshme tropikale.
Sipas raportimit të gazetës gjermane “BILD”, rastin e dytë të vdekjes e ka bërë të ditur fillimisht Zyra e Shëndetësisë në Frankfurt, ndërsa informacioni është konfirmuar edhe nga kompania që operon aeroportin, Fraport.
Rastet e para u bënë të njohura në mesin e muajit korrik. Personat e prekur ishin punonjës në sektorin e trajtimit të bagazheve në aeroportin më të madh të Gjermanisë.
Sipas Institutit Robert Koch (RKI), personat e prekur janë sëmurë ndërmjet 4 dhe 6 korrikut 2026, përcjell albinfo.ch.
Autoritetet dyshojnë se infektimi mund të ketë ndodhur nga një ose më shumë mushkonja të infektuara, të cilat mund të kenë mbërritur në Gjermani në hapësirën e ngarkesave të një avioni.
Raste të tilla njihen si “malaria e aeroportit”. Ato janë të rralla dhe mund të ndodhin kur mushkonjat që bartin parazitin e malaries transportohen pa u vërejtur me avion nga rajonet ku sëmundja është e përhapur.
Fraport ka bërë të ditur se po e monitoron nga afër situatën dhe se punonjësit e aeroportit janë informuar për rastet. Ata janë këshilluar që, në rast të shfaqjes së simptomave, të konsultohen me mjekun dhe të tregojnë se punojnë në aeroport, në mënyrë që të mund të kryhen kontrolle të synuara.
Në aeroport janë vendosur gjithashtu kurthe për mushkonja. Insektet e kapura po dërgohen për analiza gjenetike në Institutin e Mjekësisë Tropikale në Antwerp, me qëllim përcaktimin e llojit dhe prejardhjes së tyre.
Sipas RKI-së, rasti i fundit i njohur i të ashtuquajturës “malaria e aeroportit” në Gjermani ishte regjistruar në vitin 2023, po në Frankfurt.
Malaria transmetohet përmes pickimit të mushkonjave të infektuara Anopheles. Sëmundja mund të shoqërohet me temperaturë të lartë, të dridhura, dhimbje koke dhe trupi, si dhe probleme gastrointestinale. Në raste të rënda mund të shkaktojë dëmtim të organeve dhe të përfundojë me vdekje.
/albinfo
