Aksident tragjik ! Tri gra dhe një burrë humbën jetën, fëmija 4 vjeç shpëtoi..!? (VIDEO)
Ora ishte rreth 16 e 2 janarit kur policia mori njoftim se në rrugën Saraj-Rashçe, një makinë kishte dalë nga rruga dhe kishte rënë në lumin Vardar.
Krahas banorëve të zonës, shpejt në vendngjarje u panë edhe policia, ndihma e shpejtë dhe prokuroria.
U gjet se në cilën pjesë të lumit kishte rënë, por u deshën orë dhe përpjekje të shumta derisa ajo u nxor nga uji.
Rreth orës 21, sipas njoftimit të policisë, njësia speciale “Tigrat” nga lumi nxori veturën e tipit “Audi” me targa të Shkupit. Në të u gjetën trupat e tre grave, N.A. 23 vjeçe, V.A. 25 dhe Z.A 59 vjeçe, të tria nga fshati Gërçec i Shkupit.
Mjeku i ndihmës së shpejtë në vendngjarje konstatoi vdekjen, ndërsa sipas MPB-së, me urdhër të prokurorit trupat u çuan për obduksion. Nga informacionet e para, prokuroria tha se me shumë gjasa automjetin ka qenë duke e drejtuar njëra nga të ndjerat.
Po kjo tragjedi nuk mori fund me kaq, për shkak se policia nga të afërm të familjes mësoi se pasagjerë në këtë makinë kanë qenë edhe një fëmijë 4-vjeç dhe një burrë 56-vjeçar me iniciale A.A.
Fatmirësisht fëmija ka shpëtuar dhe po trajtohet në spitalin “8 shtatori” për shkak të lëndimeve trupore. Prokuroria tha se fëmija u gjet jashtë makinës. Por 56-vjeçari nuk po gjendej askund. Aksioni i kërkimit vazhdoi mbrëmë dhe sot. Me kontroll fizik u angazhuan ekipe policore, ndërsa u lëshuan edhe dy dronë.
“Nga mëngjesi, orët e hershme, sepse deri vonë punuam, nuk mund ta merrnim veten. Nga orët e hershme të mëngjesit nisëm sërish të kërkojmë, ka ekipe nga Drejtoria për Mbrojtje dhe Shpëtim, nga njësitet speciale, policia”, thotë ekipi i shpëtimit.
Trupi i pajetë i 56-vjeçarit u gjet rreth orës 15 të 3 janarit.
Nga Prokuroria thanë se edhe krahas terrenit të vështirë të paarritshëm, janë ndërmarrë të gjitha veprimet për sigurimin e gjurmëve dhe provave me qëllim përcaktimin e shkaqeve të aksidentit, ndërsa do të jepet urdhër edhe për bërjen e ekspertizës së automjetit. Po ashtu janë intervistuar dëshmitarët okularë si dhe familjarët e viktimave, me qëllim zbardhjen e të gjitha rrethanave që mund të kenë çuar në aksident.
VIDEO:
/tv21
