Aksident tragjik në Qungur të Pejës – humb jetën vëllai i reperit Gjesti ! Ngushllime familjes (FOTO)

Një aksident me pasoja fatale ka ndodhur sot pasdite në fshatin Qungur të Pejës.
Televizioni Gurra mëson se viktima është Eldion Kelmendi, vëllai i reperit të njohur Besart Kelmendi – Gjesti, fitues i edicionit të katërt të Big Brother VIP Albania.

Ngjarja ndodhi rreth orës 14:00, kur një veturë u përplas me një katërçikletë. Si pasojë e përplasjes, një person ka humbur jetën në vendngjarje, ndërsa një tjetër është lënduar rëndë. I plagosuri, me inicialet K.B, është dërguar me urgjencë në Spitalin e Pejës dhe më pas në QKUK, ku po i nënshtrohet trajtimeve intensive.

Zëdhënësi i Policisë për rajonin e Pejës, Fadil Gashi, konfirmoi për TV Gurra se ekipet policore dhe ato mjekësore kanë dalë menjëherë në vendngjarje. Ai bëri të ditur se një person është konfirmuar i vdekur, ndërsa tjetri është në gjendje të rëndë shëndetësore.

Ky aksident ka shkaktuar tronditje të madhe në komunitetin lokal dhe mes fansave të artistit Gjesti. Hetimet për shkaqet e ngjarjes po vazhdojnë nga autoritetet kompetente.

/tvgurra