Ajatollahu i Iranit shpall ‘fitore’ ndaj Izraelit në paraqitjen e parë publike..!?

Ajatollah Ali Khamenei deklaroi se Irani ka dalë “fitimtar” nga përballja 12-ditore me Izraelin dhe akuzoi Shtetet e Bashkuara për ndërhyrje të panevojshme në konflikt.

Në një fjalim të transmetuar përmes videos, lideri suprem iranian tha se “Republika Islamike i dha një shuplakë Amerikës”, duke iu referuar një sulmi hakmarrës me raketa ndaj një baze amerikane në Katar, të cilin Pentagoni konfirmoi si të pasuksesshëm dhe pa viktima.

Fjalimi i Khameneit shënoi paraqitjen e tij të parë publike që nga shpërthimi i konfliktit më 13 qershor, kur Izraeli goditi objektiva ushtarake dhe bërthamore në Iran. Ai akuzoi Uashingtonin se ndërhyri vetëm për të shpëtuar Izraelin nga “shkatërrimi i plotë”.

Armëpushimi, i ndërmjetësuar nga Presidenti amerikan Donald Trump, u arrit të martën, pas një vale sulmesh që kulmuan me bombardimin e objektit bërthamor të Fordow nga forcat amerikane. Khamenei nuk është parë në publik për ditë me radhë, mes raportimeve se ishte strehuar në një vend të fshehtë për shkak të kërcënimeve për sigurinë e tij.

Në një postim të mëvonshëm në rrjetin social X, Ajatollahu përgëzoi popullin iranian për atë që e quajti “fitore të lavdishme” ndaj Izraelit. Ndërkohë, tensionet në rajon mbeten të larta, pavarësisht armëpushimit zyrtar.

/syri.net