Ahmeti: Taravari e ka hetuar tërmetin që do të ndodh..!?

Zhvillimet mes shqiptarëve kërkojnë zgjidhje të mençura dhe pa ndërhyrje të panevojshme, deklaroi kreu i BDI-së Ali Ahmeti, duke përshëndetur vendimin e Arben Taravarit për t’u larguar nga koalicioni VLEN. Sipas Ahmetit, Taravari e kuptoi rrezikun që do t’i kthente shqiptarët dekada pas.

“Janë çështje madhore, që kërkojnë zgjidhje edhe këto zhvillime të brendshme te shqiptarët. Pa u ndërhyrë atyre në problemet e tyre të brendshme. Mirë ka bërë zotëri Taravari që e ka braktis dhe e ka hetuar tërmetin që do të ndodh. E ka hetuar që padrejtësi të mëdha dhe na kthejnë 20 vjet pas, që e braktis partneritetin. Mirë ka bërë! Por edhe këta që mbesin, mos mbesin se do mbesin ne tunel brenda. Le të ikin sa më shpejtë”, tha kryetari i BDI-së, Ali Ahmeti.

Dy ditë pas kësaj deklarate të Ahmetit në një tubim në Strugë, u kundërpërgjigj koalicioni VLEN, nga ku thonë se tërmeti ka ndodhur më 8 maj, kur ka nisur ndryshimi që nuk ndalet. Ai tërmet i para një viti, sipas VLEN-it, ishte demokratik, i pastër dhe i fuqishëm, që e solli ndryshimin për të cilin kanë punuar bashkë me qytetarët.

“VLEN është dhe do të mbetet zëri i shpresës, i reformës dhe i drejtësisë. Ne nuk jemi këtu për të prodhuar “tërmete mediatike”, por për të ndërtuar institucione funksionale, për të rikthyer besimin në shtet dhe për të çliruar potencialin e të rinjve, grave dhe gjithë shqiptarëve në Maqedoninë e Veriut. Tërmeti ka ndodhur vitin e kaluar më 8 Maj kur BDI-në e dërguam në opozitë. Tani po heqim e pastrojmë gërmadhat nga qeverisja e dështuar e BDI-së”, thonë nga koalicioni VLEN.

Drejtuesi i njërit fraksion të ASH-së, Arben Taravari, nuk është më pjesë e koalicionit VLEN, me të cilin doli në zgjedhje parlamentare dhe u bënë pjesë e qeverisë. Përçarja ndodhi pas mospajtimeve që kishin për mënyrën e daljes në zgjedhjet lokale në vjeshtë. Tash Taravari është i hapur për bashkëpunim me të gjitha partitë për kandidatët për kryetarë komunash, por jo edhe për listat për këshilltarë, të cilat do t’i ketë të veçanta, vetëm me kandidatë të ASH-së.

/tv21